SQO-da polıtseıler sıntetıkalyq esirtki satýmen aınalysqan 7 adamdy ustady
PETROPAVL. QazAqparat - Soltústik Qazaqstan oblysynda jyl basynan tártip saqshylary sıntetıkalyq esirtki bıznesine qatysy bar 7 adamdy ustady, dep habarlaıdy QazAqparat tilshisi.
Polıtsııa qyzmetkerleri sıntetıkalyq esirtkini osy zamannyń negizgi qaýip-qaterine aınalǵandyǵyn aıtady. Esirtkiniń bul túri arzan, sol sebepti «qara bazarda» suranysqa ıe. Al ony kópshilikke taratý úshin qylmyskerler ınternetti qoldanady, bul tártip saqshylaryna esirtki satýshylardy ustaýda qıyndyq týdyrýda.
SQO Polıtsııa departamenti baspasóz qyzmetiniń habarlaýynsha, oblys polıtseıleri sıntetıkalyq esirtkini taratýmen aınalysqan 7 adamdy ustady. Olardyń bireýinen 700 gr jýyq krıstall zat alyndy.
«Biz qazir bul qatermen kúreste aldyn alýǵa basymdyq beremiz. Dızaınerlik esirtki jasaıtyndar nashaqorlar qataryna barynsha kóp jastardy tartýǵa tyrysyp baǵýda. Olar úı qabyrǵalaryna esirtki saıttaryn jazyp qaldyrady. Ony aǵa býyn ókilderi túsinbegenimen, jastar ınternetti erkin meńgergen. Mundaı saıttarmen jáne olardyń jarnamasymen kúresý úshin WhatsApp messendjerinde arnaıy top qurdyq. Ol jerde polıtseılerden basqa qaladaǵy kóptegen PIK tóraǵalary otyrady.
Esirtki saıtynyń jarnamasyn kórgen kez kelgen adam ony ózdiginen boıaı almasa, sýretin jáne naqty mekenjaıyn 8-707-500-96-65 nómirine jibere alady. Biz ony syrlap qana qoımaı, saıttyń jumysyn buǵattaımyz», - deıdi Esirtki qylmysyna qarsy is-qımyl basqarmasy bastyǵy Jandos Basybaev.
Basqarma mamandary jyl basynan sıntetıkalyq esirtkini Petropavl qalasynda jarnamalap kelgen 97 ınternet-resýrsty anyqtady. Olardyń veb mekenjaılary QR Іshki ister mınıstrligine buǵattaý úshin jiberildi.
