SQO-da polıtseıler shańǵydan otbasylyq estafeta ótkizdi
PETROPAVL. QazAqparat – Soltústik Qazaqstan oblysynda tártip saqshylary shańǵy tebýden alǵash ret otbasylyq estafeta uıymdastyrdy.
Bul jarys «Dınamo» dene shynyqtyrý-sport qoǵamynyń 95 jyldyǵyna oraı ótti, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, jarys Petropavldaǵy Borkı kentinde ótti. Shańǵy jolyna árqaısysynda úsh múshesi bar 21 otbasylyq komanda shyqty. Birinshi bolyp balalar 500 metrdi baǵyndyrdy. Odan keıin shańǵyǵa analary turyp, 1 myń metrge júgirdi. Estafetany shańyraq ıeleri ilip áketip, 2 km qashyqtyqqa shańǵy tepti. Márege birinshi bolyp Baǵyttardyń otbasy jetti. Erli-zaıyptylardyń ekeýi de maıor shenindegi polıtsııa qyzmetkeri. Olardyń 12 jastaǵy qyzdary Tamıla 7 synypta oqıdy, sportpen shuǵyldanady.
«Maǵan sporttyq jarystarǵa qatysqan óte unaıdy. Áke-sheshemniń jumysynda osyndaı estafeta uıymdastyrǵandaryna alǵysymdy aıtamyn. Jarys kóńildi ótti», - deıdi Tamıla.
Ekinshi oryndy jedel áreket etý arnaıy jasaǵynyń qyzmetkeri Saıat Ábilqaıyrovtyń otbasy jeńip aldy. Al úshinshi oryn Áýbákirovtar otbasyna buıyrdy. Bul otbasynda da jubaılar - tártip saqshylary. Bireýi Qyzyljar aýdandyq polıtsııa bóliminde, ekinshisi krımınaldy polıtsııa basqarmasynda isteıdi.
Budan basqa «Polıtseı otbasy» atalymynda Zemskııler otbasy marapattalsa, Aıyrtaý aýdandyq polıtsııa bóliminiń qyzmetkeri Danııar Tańsyqbaevtyń shańyraǵy «Jeńiske umtylysy úshin» nomınatsııasyn jeńip aldy.
Al M.Jumabaev aýdanynyń ýchaskelik polıtsııa ınspektorynyń 8 jasar uly Rasýl Jumanov jarystyń eń jas qatysýshysy dep tanylyp, arnaıy syılyqqa ıe boldy. Bul kúni estafetaǵa qatysqan balalardyń eshqaısy syılyqsyz qalmady.
«Soltústik óńirde shańǵy sporty jaqsy damyǵan. Sol sebepti biz búgingi jarysty dástúrli túrde ótkizýdi josparlap otyrmyz. Bizdiń memleketke birligi jarasqan, deni saý otbasy kerek. Mundaı jarystardyń polıtsııa vedomstvosy úshin mańyzy zor. Óıtkeni mundaı is-sharalarda olar demalys kúnderin otbasylarymen, este qalarlyqtaı qyzyqty, ári densaýlyqqa paıdaly etip ótkizedi», - deıdi SQO PD bastyǵynyń orynbasary Qapez Dáýletbaev.
Bul joly qysqy estafeta «Dınamo» dene shynyqtyrý-sport qoǵamynyń 95 jyldyǵyna oraı uıymdastyryldy.
