SQO-da polıtseıler Reseı aýmaǵynda izdeýde júrgen óńir turǵynyn ustady
SQO polıtsııa departamenti baspasóz qyzmetiniń málimetinshe, patrýldik polıtsııa batalonynyń barlyq ekıpajy zamanaýı baılanys tehnıkasymen jabdyqtalǵan. Olar kez-kelgen ýaqytta QR ІІM derekter bazasyna kire alady.
Qyzyljar aýdanynyń aýmaǵynda «Petropavl-Esil» avtojolynda qyzmet atqaryp júrgen tártip saqshylary tekserý maqsatynda «Audi» avtokóligin toqtatqan. Tizginde Shal aqyn aýdanynyń 28 jastaǵy turǵyny bolǵan. Qujatty tekserý barysynda er adamnyń halyqaralyq izdeýde júrgeni anyqtaldy. Іzdeýdi Chelıabi oblysy boıynsha RF ІІM basqarmasy jarııalaǵan.
SQO turǵyny bir adam zardap shekken jol-kólik oqıǵasyn jasady degen kúdikpen izdeýde júrgen. Qyzyljar aýdany polıtsııa bóliminiń krımınaldyq polıtsııa qyzmetkerleri ustalǵannan jaýap aldy, reseılik áriptesterine habarlama jiberdi.
«Ákimshilik óndiristiń biryńǵaı tizilimine, derekter bazalaryna qosylǵan planshetter patrýldik polıtseıdiń jumys tıimdiligin aıtarlyqtaı arttyrady. Jyl basynan batalon qyzmetkerleri baǵdar paraǵy boıynsha 15 adamdy, sondaı-aq halyqaralyq izdeýde júrgen bir adamdy anyqtady. 39 júrgizýshi mas kúıde ustaldy. Budan bólek, 3 aıdyń ishinde patrýldik polıtseıler 2 qylmysty ashýǵa qatysyp, ruqsat qujatynsyz tyıym salynǵan zattardy jáne taýarlardy zańsyz tasymaldaýdyń 58 faktisin anyqtady. Onyń ishindegi 13-i – et ónimderin jáne sonshasy mal tasymaldaý faktisi» , - deıdi SQO polıtsııa departamenti patrýldik polıtsııa batalony komandıri Erlan Mádıev.
