SQO-da polıtseıler pırotehnıkalyq buıymdar satatyn oryndardy baqylaýǵa aldy

PETROPAVL. QazAqparat – Soltústik Qazaqstan oblysynda Jańa jyl merekesi qarsańynda «Pırotehnıka» respýblıkalyq jedel-profılaktıkalyq is-sharasy bastalyp, tártip saqshylary saýda oryndaryn tekserýdi qolǵa aldy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, «Pırotehnıka» aktsııasynyń maqsaty – halyqty sapasyz otshashýlar men petardalardy qoldanýdan qorǵaý.

«Pırotehnıkalyq buıymdardyń lıtsenzııasy bolsa da, ony asqan saqtyqpen, tıisti talaptaryn oryndaı otyryp qoldaný qajet. Nusqaýlyǵy mindetti túrde qaptamanyń syrtynda qazaq jáne orys tilderinde jazylýy kerek. Pırotehnıkany balanyń qolyna berýge bolmaıdy. Sondaı-aq lıtsenzııasy joq feıerverkterdiń eki ese qaýipti ekenin esten shyǵarmaǵan jón. Sapasyna kepildik bolmasa, buıym aldyn ala qolda jarylyp ketip, densaýlyqqa zııan kelýi, tipti, ómirge qaýip týdyrýy múmkin», - deıdi SQO PD Ákimshilik polıtsııa basqarmasynyń bastyǵy Jasulan Ospanov.

Polıtseılerdiń sózine qaraǵanda, pırotehnıkalyq buıymdardy eldi mekenderde qoldanǵandarǵa jáne balalaryna bul qaýipti zatpen oınaýǵa ruqsat bergen ata-analarǵa 20 AEK mólsherinde aıyppul qarastyrylǵan.

Feıerverkter men petardalardy tıisti ruqsat qujattarynsyz satqandar da ákimshilik jaýapqa tartylady. Aıyppul kólemi 25 AEK mólsherinde. Al lıtsenzııasy bolǵanymen saqtaý, tasymaldaý, satý, joıý jáne basqa da talaptardy buzǵandarǵa 5 pen 45 AEK mólsherinde aıyppul salynady.

«Pırotehnıka» respýblıkalyq jedel-profılaktıkalyq is-sharasy 3 qańtarǵa deıin jalǵasady.