SQO-da polıtseıler órtten gaz ballonyn alyp shyǵyp, erli-zaıypty zeınetkerlerdi qutqardy
PETROPAVL. QazAqparat – Soltústik Qazaqstan oblysynda polıtseıler órtengen qora-qopsydan 50 lıtrlik gaz ballonyn alyp shyǵyp, erli-zaıypty zeınetkerdi aman alyp qaldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, oqys oqıǵa 1 sáýir kúni Qyzyljar aýdany Sokolovka eldimekeninde bolǵan.
Saǵat 21.40-ta jumys bastalar aldyndaǵy nusqaýlyq kezinde, polıtseıler órttengen shıferdiń qatty dybysyn estıdi.
Jalyn kelesi kóshedegi úılerdiń birinen shyqqan eken.
Kezekshiniń kómekshisi órt sóndirý qyzmetine qońyraý shalyp, qalǵan úsh ofıtser órt shyqqan úıge qaraı júgiredi.
Poselkelik polıtsııa bóliminiń bastyǵy Eldar Allahveranov terezeni tarsyldatyp, úı ıelerine habar beredi.
65 jastaǵy erli-zaıypty ol kezde balalarymen telefon arqyly sóılesip jatqan eken.
Al ýchaskelik ınspektorlar Azamat Qabdrashıtov pen Nazar Mendekeev qorshaýdan sekirip túsip, maldy shyǵarý qajet bolar degen oımen qora-qopsyny teksergen.
Janyp jatqan saraıdan olar ot sharpýǵa jaqyn qalǵan 50 lıtrlik gaz ballondy kóredi.
Ballondy eki polıtseı kóterip alyp, qaqpanyń syrtyna alyp shyqqan.
Úı ıesi qoraǵa kirmek bolady, biraq Eldar Allahveranov ony jibermegen: órttiń tez taralýynan, ishine kirý qaýipti edi.
Kómekke kelgen kórshilermen birge tártip saqshylary órtti sóndirýge tyrysqan.
Osy ýaqytta órt sóndirý qyzmeti de jetip, 14 sharshy metr jerdi jaılaǵan jalyn sóndirildi.
Órt sóndirýshilerdiń jedel qımylynyń arqasynda qalǵan ǵımarattar búlingen joq. Turǵyndardyń taýyqtary da aman qaldy.
«Poselkelik polıtsııa bólimshesiniń qyzmetkerleri daǵdarys jaǵdaıynda durys is-áreket jasaı bildi. Shuǵyl qımyldap, durys sheshim qabyldap, aýyr zardaptyń aldyn aldy. Іshinde gazy bar ballon jarylǵanda saldary aýyr bolar edi. Polıtsııa maıory Allahveranov bastaǵan polıtsııa qyzmetkerleri óz mindetterin abyroımen atqaryp, kúndelikti mindetterine kiristi. Osyndaı sátterde polıtsııa qyzmetkerleriniń halyqqa qyzmet etýge degen adaldyǵy synalady», - deıdi Qyzyljar aýdany polıtsııa bólimi bastyǵynyń mindetin atqarýshy Petr Klımov.
