SQO-da polıtseıler muqtaj jandarǵa aýlalaryn qardan tazartýǵa kómektesip jatyr

PETROPAVL. QazAqparat – Soltústik Qazaqstan oblysynda polıtseıler qaıyrymdylyq aktsııalaryna qatysyp, turǵyndardyń aýlalaryn qalyń qardan tazalaýǵa kómektesip jatyr, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, tártip saqshylary Ǵ.Músirepov atyndaǵy aýdanda qıyn jaǵdaıǵa tap bolǵan otbasyny anyqtaǵan. Aýyl turǵynynyń alty balasy bar eken. Jaǵarǵa kómiri taýsylyp, al ákelýge qar qursaýynda qalǵandyqtan múmkindigi bolmaǵan. Polıtseıler «Mıheev» jeke kásipkerligine júginip, aýyr tehnıkanyń kómegi arqasynda úıge barar joldy arshydy.

Tártip saqshylary qaıyrymdylyq aktsııasy aıasynda on shaqty janǵa áleýmettik kómek kórsetti. Qushaqtary gúlge toly polıtseıler syılyqtaryn alyp, Uly Otan soǵysy jáne ishki ister organdarynyń ardagerlerine, tyl eńbekkerlerine, UOS ardagerleriniń jesirlerine baryp qaıtty. Sondaı-aq tártip saqshylary otbasylyq úlgidegi balalar aýylynda bolyp, halyqtyń áleýmettik osal toptaryna: jalǵyzilikti egde jandarǵa, jetimderge, múmkindikteri shekteýli balalarǵa, kópbalaly jáne az qamtylǵan otbasylarǵa kómek kórsetti.

«Kóktem - barlyq ıgi istiń bastaýy. Kóktem bastalǵaly polıtsııa qyzmetkerleri elýge tarta mekenjaıǵa baryp qaıtty. Halyqtyń áleýmettik osal toptaryna kómek tek merekede ǵana emes, basqa ýaqyttarda da kórsetiletinin atap ketken jón. Kóptegen bólinister ózderi bastamashylyq tanytyp, kómekke muqtaj adamdarǵa qoldaý kórsetip jatyr. Aýdandyq bólinister de bul isten shet qalǵan joq. Jalǵyz turatyn zeınetkerlerdiń aýlalaryn qardan tazartýǵa kómektesip jatyr», - deıdi SQO PD bastyǵy Marat Tólebaev.