SQO-da polıtseıler marapattalyp, kezekti shenderin aldy
PETROPAVL. QazAqparat – Soltústik Qazaqstan oblysynda polıtsııa departamentiniń bastyǵy Marat Tólebaev óńirdiń qoǵamdyq tártibi men jol qaýipsizdigin saqtaýǵa kezekshilikke túsetin polıtsııanyń keshendik kúshteriniń garnızondyq taratylýyn ótkizdi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, garnızondyq taratylýda saltanatty túrde birqatar qyzmetkerler kezekti arnaıy shenderin alsa, bir tártip saqshysy medalmen marapattaldy.
Departament Shtabynyń erekshe tapsyrmalar jónindegi aǵa ınspektory Rýstam Jarov ishki ister organdarynda 2001 jyldan bastap qyzmet atqaryp keledi. 2009 jylǵa deıin ýchaskelik polıtsııa ınspektory, kámeletke tolmaǵandardyń isteri jónindegi ınspektor, kezekshi bólimniń qyzmetkeri bolyp eńbek etti. 2017 jyldan osy ýaqytqa deıin oblystyq Polıtsııa departamentiniń Shtabynda qyzmette. Búginnen bastap ol polıtsııa podpolkovnıgi. Taǵy alty qyzmetker oblystyń bas polıtseıiniń qolynan kezekti shenderin aldy. Petropavl qalalyq polıtsııa basqarmasy jedel basqarý ortalyǵynyń kezekshi bólimi kezekshisiniń tájirıbeli kómekshisi Andreı Korjov «QR ishki ister organdarynyń ardageri» medalimen marapattaldy.
Budan bólek, polıtsııa general-maıory Marat Tólebaev tártip saqshylarynyń kıim kıisi men qyzmet ótkerýge ázirlikterin tekserdi.
Oblys ortalyǵynda kún saıyn qoǵamdyq tártipti qamtamasyz etýge patrýldik polıtsııa batalony, ýchaskelik ınspektorlar, oblystyq jáne qalalyq polıtsııa apparatynyń, mamandandyrylǵan kúzet qyzmeti basqarmasynyń qyzmetkerleri, Ulttyq ulannyń áskerı qyzmetshilerinen quralǵan ondaǵan jaıaý jasaqtar men avtopatrýlder shyǵady. Marat Tólebaev polıtseıler qylmyskerler men quqyq buzýshylardy ustaý kezinde jedel jáne kásibı áreketterge, túrli jaǵdaılarǵa tap bolǵan turǵyndarǵa kómek kórsetýge daıyn bolýy qajet ekenin atap ketti.
Garnızondyq taratý saltanatty marshpen aıaqtalyp, saqshylar men áskerı qyzmetshiler qyzmet atqarý oryndaryna tarqasty.
