SQO-da polıtseıler kúsheıtilgen rejımde jumys isteýde
PETROPAVL. QazAqparat – Soltústik Qazaqstan oblysynda merekege oraı polıtsııa qyzmettiń kúsheıtilgen túrine kóshti, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, mereke túni qoǵamdyq tártipti polıtsııanyń 410 qyzmetkeri qamtamasyz etedi. Buqaralyq is-sharalar ótkizilmegenimen, Petropavlda jasaqtar sany ulǵaıtylyp, tártip saqshylary adamdar kóp jınalýy múmkin oryndarǵa jiberiledi. Oblys turǵyndary súıikti merekelerin tynysh qarsy alýy úshin polıtsııa jeke quramynyń 30 % jumys oryndarynda bolady. Óńir boıynsha jedel kezekshi jetekshilik etetin kezekshi aýysym qańtardyń 1-i saǵat 08.00-ge deıin óńirdegi quqyqtyq tártiptiń jaǵdaıy týraly aqparat jınaıdy, bólinisterdiń is-qımyldaryn úılestiredi. Bul eń tájirıbeli qyzmetkerge senip tapsyratyn barynsha jaýapty qyzmet.
Polıtsııa podpolkovnıgi Nurlan Qusaıynov 2022 jyldy jumys ornynda qarsy alady. Onyń jedel kezekshilikke túsip júrgenine biraz jyl, alaıda jańa jyldyq túnde kezekshilikke alǵash túsip ootyr.
«Tájirıbe kórsetkendeı, SQO-da Jańa jyldy merekeleý tynysh ótedi. Shaqyrtýlar sany, ádette, qańtardyń alǵashqy kúnderi artady. Degenmen, mereke kúni kezekshilikke túsý – úlken jaýapkershilik», - deıdi tártip saqshysy.
Kezekshi aýysymdy SQO PD bastyǵy Marat Tólebaev jeke ózi quttyqtady. Petropavl qalalyq PB Jedel basqarý ortalyǵy zalynda barlyq kezekshi qyzmetkerlerdi, polıtsııa vedomstvosynyń jeke quramyn, oblys turǵyndary men qonaqtaryn quttyqtady.
«Polıtsııanyń basty mindeti – azamattardyń qaýipsiz ómir súrýine jaǵdaı jasaý. Jerlesterimizdiń tynyshtyqtary men qaýipsizdikterin qamtamasyz etý úshin osy mereke kúnderi biz qyzmettiń kúsheıtilgen túrinde qyzmet atqaramyz», - deıdi Marat Tólebaev.
