SQO-da polıtseıler kún raıynyń buzylýyna baılanysty turǵyndardy jolda saq bolýǵa shaqyrdy
PETROPAVL. QazAqparat – Soltústik Qazaqstan oblysynda erteńnen bastap kún sýytyp, kóktaıǵaq turmaq. Jol-kólik apattarynyń aldyn alý maqsatynda polıtseıler turǵyndarǵa saqtyq sharalaryn eske saldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, óńirde bolǵan sońǵy kóktaıǵaqta 17 jol-kólik oqıǵasy tirkelip, 30 adam zardap shekken. Osyndaı jaǵdaı qaıtalanbas úshin polıtseıler júrgizýshiler men jaıaý júrginshilerdi jol ústinde saq bolýǵa shaqyrady.
«Maýsymaralyq kezeń jol qozǵalysynyń barlyq qatysýshylary úshin qaýipti ýaqyt. Joldaǵy muz kóliktiń tejeýin qıyndatady. Jaıaý júrginshiler avtokólikterdiń muz ben qarda birden toqtaı almaıtynyn esten shyǵarmaýy kerek. Joldyń ekinshi jaǵyna óter kezde, barlyq júrgizýshilerdiń sizge jol berip jatqanyna kóz jetkizý qajet.
Qazirgi ýaqytta oblystaǵy avtokólik ıeleriniń basym kópshiligi qysqy shınalaryn salyp aldy. Alaıda, qysqy dóńgelekterdiń osal tusy bar. Sý jatqan asfaltta kólik tizginine ıe bola almaı qalýyńyz múmkin. Sol úshin jyldamdyqty múmkindiginshe asyrmaı, qaýipsizdik sharalaryn ustanǵan jón», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
Tártip saqshylary aýa raıy qubylyp, ózgergen jaǵdaıda jyldamdyqty tómendetýge jáne kólik quraldary arasyndaǵy qashyqtyqty arttyrýǵa keńes beredi.
