SQO-da polıtseıler qatty aıazda jolda qalǵan eki otbasyn qutqardy
PETROPAVL. QazAqparat – Soltústik Qazaqstan oblysynda polıtseıler qatty aıazda kóligi synyp jolda qalǵan eki otbasyn – 3 eresek jáne 5 balany qutqardy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, jańa jyldy aýylda qarsy alǵan eki otbasy jeksenbiniń keshinde Sergeevkadan Petropavlǵa kólikpen shyqqan. Novonıkolskoe eldimekeniniń mańynda «VAZ 2110» kóligi synyp qalǵan. Joldyń shetinde turǵan kólikke sol jerde kezekshilik atqaryp júrgen polıtseıler kómekke keldi.
«Sol kúni aýa temperatýrasy -34 gradýs bolǵanymen, yzǵary jeldiń kúshimen birge - 40-qa deıin jetti. Mundaı qatty aıazdarda alys jolǵa shyqpaýǵa keńes beremiz. Biraq bul eskertýdi elemeıtinder de bar. Kezekshilik barysynda jol shetinde turǵan kólikti kórdik. Mashına synyp qalǵan eken. Salonda eki otbasy: júrgizýshi, eki áıel jáne 5 bala bar, sonyń biri emshektegi sábı. Júrgizýshige kórshi aýyldan mashınasyn jóndeýge kómek shaqyrdyq, al áıelderdi balalarymen «Ońtústik-Shep» postyna jetkizdik. Sol jerden olardy qalalyq batalonnyń patrýldi polıtseıleri úılerine aparyp saldy», - deıdi patrýldi polıtsııa batalonynyń ınspektory Shalqar Qapezov.
Al jergilikti sharýashylyq jumysshysy júrgizýshige kóligin jóndeýge kómektesip, ol saparyn jalǵastyrdy.
«Biz árdaıym kómekke kelýge daıynbyz. Biraq, osyndaı aýa raıynda asa qajettilik bolmasa jolǵa shyqpaýlaryńyzdy suraımyz. Qatty aıaz kez kelgen júrgizýshini jolda qaldyrýy múmkin. Sharýa qojalyqtaryna, jolda qalǵandardan kómegin aıamaıtyndarǵa alǵys aıtamyz», - deıdi SQO PD jergilikti polıtsııa qyzmeti basqarmasynyń patrýldi polıtsııa batalonynyń komandıri Erlan Mádıev.
Qazir oblys joldarynda táýlik boıy 16 avtopatrýl kezekshilik etedi. Jyl bastalǵaly olar kóligi synyp jolda qalǵan onnan astam júrgizýshige kómek berdi.
