SQO-da polıtseıler kásibı mereke qarsańynda velosherý ótkizdi
PETROPAVL. QazAqparat - Soltústik Qazaqstan oblysynyń polıtseıleri Qazaqstan polıtsııasy kúni qarsańynda 100-den astam adam qatysqan dástúrli velosherý uıymdastyrdy, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, dástúrli velosherý úshinshi jyldan beri ótkizilip keledi. Jarysqa bıyl tártip saqshylary ǵana emes, olardyń otbasy músheleri jáne polıtsııa ardagerleri qatysty.
Jarysty úsh aıaqty velosıped, «samokat» mingen balalar ashyp berdi. Olardan keıin saıysty sál eresek jasóspirimder jáne velomekteptiń tárbıelenýshileri jalǵastyrdy. Márede balalarǵa arnaıy syılyqtar berildi.
Negizgi velosherý «Dınamo» sport kesheninen bastaldy. Tártip saqshylary Petropavldyń Partızan, Jambyl, Bóketov jáne Astana sııaqty ortalyq kóshelerimen júrip ótti.
«Sport adamnyń densaýlyǵyn qalypta ustaýǵa kómektesedi. Dene shymyrlyǵy- quqyq qorǵaý organdarynda eńbek etetin qyzmetkerlerge qoıylatyn negizgi talaptardyń biri. Jalpy, biz osy salaýatty ómir saltyn nasıhattaý arqyly turǵyndardy sportqa kóbirek tartqymyz keledi», - dedi velosherýge qatysqan vedomstvo basshysy Marat Tólebaev.
Bul kúni Polıtsııa departamenti basshysynyń orynbasarlary, basqarmalardyń basshylary velosıpedke otyrdy. Tótenshe jaǵdaılarda adamdardy qutqaryp, erlik kórsetken batyr-polıtseıler jáne vedomstvonyń mádenı ortalyǵynyń músheleri, túrli qyzmetterdiń áıel basshylary jeke-jeke júrip ótti.
Úsh shaqyrymdy baǵyndyrǵan velosherýshilerdi turǵyndar Qazaqstan Konstıtýtsııasy kóshesindegi Polıtsııa departamentiniń ákimshilik ǵımaratynyń qasynda saltanatpen kútip aldy.
Al Mamandandyrylǵan kúzet qyzmeti basqarmasy oblystyq apparattyń bastamasyn qoldap, bir kún buryn 70 qyzmetkeri qatysqan velosherý ótkizdi.
