SQO-da polıtseıler qar kúreýge shyqty
SQO Polıtsııa departamenti baspasóz qyzmetiniń málimetinshe, polıtseıler ıgi isti jeltoqsan aıynda qolǵa aldy. Sodan beri ár demalys saıyn oblystaǵy jalǵyzilikti qarttardyń úıine baryp, qar kúreýge kómektesedi. Osy joly 20 shaqty tártip saqshysynyń qataryna eriktiler qosyldy.
Stýdentter men oqýshylardan quralǵan volonter otrıadyn ishki ister organdarynyń zeınetkeri, otstavkadaǵy podpolkovnık Petr Aksenov basqardy. Olar Shájimbaev kóshesindegi úıdiń aýlasynan qar shyǵardy. Bul úıde vedomstvonyń zeınetkeri, 81 jastaǵy Valerıı Lýkashov turady.
Al Jumysshy poselkesinde polıtseıler ishki ister organdarynyń zeınetkeri 67 jastaǵy Sáken Báketovke kómektesti. Onyń aýlasyndaǵy qardy shyǵaryp bolǵannan keıin, kórshisi 80 jastaǵy Natalıa ıAnyshevaǵa kómek qolyn sozdy.
40 jyldyq eńbek ótili bar Marııa Býrjınskastyń da aýlasy áp-sátte qardan tazartyldy. Al kınologııalyq ortalyqtyń qyzmetkerleri Máskeý kóshesindegi zeınetkerge taǵy bir márte kelip, bul joly aýlasymen qatar, shatyrdaǵy qardy da túsirip, shyǵaryp berdi.
«Mundaı is-sharalar tárbıelep qana qoımaı, ujymdyq baılanysty nyǵaıtady. Al volonterler bizdiń qyzmetkerlerge qarap boı túzeıdi, polıtsııa qyzmetine qyzyǵýshylyq bildiredi. Zeınetkerlerimiz ystyq yqylasyn bildirip, batalaryn berip jatady», - deıdi Petropavl qalalyq polıtsııa basqarmasy bastyǵynyń orynbasary Saǵyndyq Temireev.
