SQO-da polıtseıler elikti múshelep jatqan brakonerdi ustady
PETROPAVL. QazAqparat – Soltústik Qazaqstan oblysynda jyl basynan zańsyz ań aýlaýǵa qatysty 5 derek tirkelgen, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, 4 aqpan kúni oblystyq jáne aýdandyq tabıǵatty qorǵaý polıtsııasy tobynyń qyzmetkerleri men «Sokolov» ańshylyq sharýashylyǵynyń aǵa qoryqshysy birge sharýashylyq aýmaǵyna reıdke shyqty. Olar Jelıakovo eldi mekeni mańynda qarda júrgish tehnıkany tizgindegen oblystyń eki turǵynyn baıqaıdy. Іzben júrip otyryp, ań aýlaý jabdyqtaryn jáne eki sibir eligin anyqtaıdy. Ańshylar bir elikti aǵashqa asyp, músheleı bastaǵan eken.
Atalǵan fakti QR Qylmystyq kodeksiniń «Zańsyz ań aýlaý» 337-baby boıynsha Sotqa deıingi tergep-tekserýdiń biryńǵaı tizilimine engizildi. Oqıǵa ornynan eki eliktiń eti, esepke qoıylmaǵan «Yamaha» qarda júretin kóligi tirkemesimen jáne tirkelmegen myltyq, ańshy pyshaǵy, sondaı-aq oq-dári alyndy. Petropavl qalasynyń 35 jastaǵy turǵyny ustalyp, Qyzyljar aýdandyq polıtsııa bóliminiń ýaqytsha ustaý ızolıatoryna qamaldy. Sotqa deıingi tergep-tekserý júrgizilip jatyr, polıtseıler kúdiktiniń janynda bolǵan týysynyń qylmysqa qatysy bar-joǵyn anyqtamaq.
«Bul «Brakoner» jedel-profılaktıkalyq sharasy kezinde anyqtalǵan 4-shi fakti bolyp otyr. Eliktiń býaz ekendigin anyqtaý úshin usha saraptamaǵa jiberildi, soǵan baılanysty aıyppul kólemi anyqtalady. Sondaı-aq, 1 qańtardan qos tuıaqtylardy aýlaýǵa tyıym salynǵanyn esterińizge salamyz», - dep habarlaıdy Jergilikti polıtsııa qyzmeti basqarmasy tabıǵatty qorǵaý polıtsııasy tobynyń aǵa ınspektory Ashat Qojabaev.
6 qańtarda bastalǵan «Brakoner» jedel-profılaktıkalyq is-sharasy 5 aqpanda aıaqtaldy. Osy aralyqta SQO polıtseıleri 267 ákimshilik quqyq buzýshylyqty anyqtasa, onyń 156-sy ańshylyqqa, 53-i balyq aýlaýǵa qatysty.
