SQO-da polıtseıler eki aptada 18 myńnan astam páterdi aralady
PETROPAVL. QazAqparat – Soltústik Qazaqstan oblysynda ýchaskelik polıtsııa ınspektorlary eki aptanyń ishinde 18 myńnan astam páterdi aralap shyqty. Óńirde «Ýchaske» respýblıkalyq jedel-profılaktıkalyq is-sharasy ótip jatyr, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, 1 qazannan bastap óńirde «Ýchaske» respýblıkalyq jedel-profılaktıkalyq is-sharasy ótip jatyr. Aktsııanyń maqsaty - quqyq buzýshylyqtar men qylmystardyń aldyn alý, sondaı-aq azamattarmen tyǵyz jáne senimdi qarym-qatynas ornatý. Ýchaskelik polıtsııa ınspektorlary is-shara aıasynda ózderine bekitilgen aýmaqtaǵy úı-úıdi aralap shyǵýy tıis.
Petropavlda ýchaskelik ınspektorlar Jumysshy kentindegi Ostrovskıı kóshesi, 149 mekenjaıyndaǵy kóppáterli úılerdiń aýlasynda kezdesý ótkizdi.
Tártip saqshylary aýla turǵyndaryna qashyqtyqtan jasalatyn alaıaqtyqtyń aldyn alý týraly egjeı-tegjeıli aıtyp berdi. Tájirıbe kórsetkendeı, jelidegi alaıaqtardyń quryǵyna ádette zeınetkerler túsedi. Polıtseıler ınternet-alaıaqtardyń jıi kezdesetin stsenarııleri men mehanızmderi týraly aıtyp, jadynamalar taratty.
Petropavl qalalyq polıtsııa basqarmasy bastyǵynyń birinshi orynbasary Álibek Ǵabdýllınniń aıtýynsha, «Ýchaske» jedel-profılaktıkalyq is-sharasy 1 qarashaǵa deıin jalǵasady. Polıtsııa qyzmetkerleri qala turǵyndary men qonaqtarynan is-sharanyń ótýine túsinistikpen qaraýdy surady jáne ishki ister organdarynyń qyzmetkerlerine barynsha járdem kórsetýge shaqyrady. Kúdik týǵyzatyn adamdar týraly «102» nómirine habarlaý qajet.
1 qazannan bastap oblys boıynsha tártip saqshylary osyndaı kezdesýlermen kópqabatty úılerdiń 18 myńnan astam páteri jáne 25 myńnan astam jeke úıin qamtydy. Turǵylyqty jeri boıynsha ishki ister organdarynda ár túrli esepte turǵan 972 adam, sondaı-aq 129 qolaısyz otbasy tekserildi. Turǵylyqty mekenjaıy joq 24 adam ustaldy. Jaldamaly 1120 páter tekserildi, onda tirkeýsiz jaldaýǵa turǵyn úı berýdiń 58 faktisi anyqtaldy, olar boıynsha usynystar salyq organdaryna jiberildi. Atys qarýynyń 2092 ıesi tekserildi, nátıjesinde qarýdy saqtaý erejelerin buzýdyń 6 deregi anyqtaldy.
