SQO-da polıtseıler COVID-19-ǵa qarsy vaktsına alyp jatyr

PETROPAVL. QazAqparat – Soltústik Qazaqstan oblysynda polıtseıler koronavırýsyna qarsy ekpe alýdy bastady, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, tártip saqshylary COVID-19-ǵa qarsy «Spýtnık V» vaktsınasyn «Densaýlyq» jekemenshik kommertsııalyq emes mekemesinde jáne aýdandyq ortalyq aýrýhanalarda alyp jatyr.

Búgin emhanaǵa kezeń-kezeńmen 40 tártip saqshysy kelip, ekpe aldy. Olar oblystyq jáne qalalyq vedomstvonyń qyzmetkerleri. Solardyń biri - «102» pýltiniń operatory, polıtsııa serjanty Irına Ramazanova. Aıtýynsha, vaktsınadan keıingi jaǵdaıy jaqsy. Ekpeni alý arqyly eń aldymen jaqyndaryn, týystaryn qaýipti ınfektsııadan qorǵamaq.

SQO PD medıtsınalyq bólimniń jetekshisi Sergeı Fedorovtyń aıtýynsha, ózdiginen vaktsına alǵysy keletin qyzmetkerlerdiń tizimi jasaldy. Búgin oblys ortalyǵynda birinshi kúni 40 adamǵa ekpe egildi. Qalǵan kúnderge de sonsha adamnan josparlanǵan.

Polıtsııa departamentiniń bastyǵy Marat Tólebaev naýqan bastalǵan kezde basqalarǵa úlgi kórsetip eń birinshi bolyp vaktsına aldy.

«Vaktsınatsııa kerek. Ekpe alý arqyly densaýlyq saqtaý salasyna qaýipti ınfektsııamen kúresýge kómektesemiz, onyń ári qaraı taralýyna tosqaýyl qoıamyz.

Ár qyzmetker ózi úshin durys sheshim qabyldaýy qajet», - deıdi Marat Tólebaev.

Polıtseıler de dárigerler sııaqty KVI-men kúreste aldyńǵy shepte júrgen mamandardyń biri. Olar qoǵamdyq oryndarda, joldarda tártipti qadaǵalaıdy.

Osy ýaqytqa deıin 3 myńnan astam tártip saqshysy PTR test tapsyrǵan.