SQO-da polıtseıler bir kúnde jolda júrý tártibin buzýdyń 500-den astam deregin anyqtady
PETROPAVL. QazAqparat - Soltústik Qazaqstan oblysynda «Qaýipsiz jol» respýblıkalyq jedel-profılaktıkalyq is-sharasy ótip jatyr, dep habarlaıdy QazAqparat tilshisi.
Aktsııanyń alǵashqy kúniniń nátıjeleri týraly SQO Polıtsııa departamenti baspasóz qyzmeti málim etti. Іs-sharanyń maqsaty - jol-kólik oqıǵalarynyń aldyn alý, apat sanyn azaıtý. Basty nazarda - jol qozǵalysy erejeleriniń óreskel buzýshylyqtary, jolaýshylardy tasymaldaýdyń qaýipsizdigi.
Trassalarǵa, eldi mekenderdiń, qalalardyń kóshelerine 130-dan astam beket pen patrýl shyǵaryldy. Operatsııanyń birinshi kúni-aq 13 mas júrgizýshi ustalyp, 3 jylǵa júrgizýshi kýáliginen aıyryldy.
«Júrgizýshilerdiń biri qylmystyq jaýapkershilikke tartylýy múmkin. Ony tekserý barysynda buǵan deıin mas kúıde kólik júrgizgeni úshin 3 jylǵa júrgizý quqyǵynan aıyrylǵany, ol merzimniń áli aıaqtalmaǵany anyqtaldy. Sondaı-aq júrgizýshiniń ózin-ózi ustaýy polıtseılerdiń nazaryn aýdaryp, saraptama onyń esirtki paıdalanǵanyn kórsetti», - deıdi SQO PD Jergilikti polıtsııa qyzmeti basqarmasynyń bastyǵy.
Kelesi bir júrgizýshi, Qyzyljar aýdanynyń turǵyny ruqsat beretin qujatsyz jolaýshylardy tasymaldaýmen aınalysqan. Ol da mas kúıde kólik basqarǵany úshin júrgizý quqyǵynan aıyrylǵan eken. Sondaı-aq polıtseıler jyldamdyqty asyrýdyń 38, manevr jasaý qaǵıdalaryn buzýdyń -14, baǵdarshamnyń qyzyl belgisine ótýdiń 17 faktisin anyqtady.
Oblystyń tártip saqshylary «Qaýipsiz jol» respýblıkalyq jedel-profılaktıkalyq is-sharasynyń bir kúninde ǵana jolda júrý erejesiniń 541 buzýshylyǵyn anyqtady.
