SQO-da polıtseıler balyq aýlaýǵa ýaqytsha tyıym salynǵanyn eskertti
SQO polıtsııa departamenti baspasóz qyzmetiniń málimetinshe, ýyldyryq shashý kezeńiniń bastalýyna baılanysty 15 sáýir men 20 maýsym aralyǵynda Esil, Nura, Sileti ózenderinde jáne onyń salalarynda, Aqmola jáne SQO aýmaǵyndaǵy barlyq sý qoımalarynda balyq aýlaýǵa tyıym salynady.
Budan bólek, Esil ózeni men onyń salalarynda ár balyqty aýlaýǵa qatysty basqa da shekteýlerdiń barlyǵyn esten shyǵarmaý qajet:
15 sáýir men 15 mamyr aralyǵynda – shortan, aqqaıran, kókserkeni;
20 mamyr men 20 maýsym aralyǵynda tuqy balyǵyn;
1 tamyz ben 14 qyrkúıek aralyǵynda gammarýsty;
1 naýryz ben 15 maýsym aralyǵynda – artemia salina jumyrtqalaryn;
1 maýsym men 15 shilde aralyǵynda – ózen shaıandaryn aýlaýǵa, jınaýǵa tyıym salynǵan.
Osyǵan oraı tabıǵatty qorǵaý zańnamasynyń saqtalýyn qadaǵalaý boıynsha reıdtik is-sharalar kúsheıtilmek. Munymen qatar, ańshylyq erejeleriniń saqtalýy da tekseriledi.
Al 22 sáýirden 6 mamyrǵa deıin jabaıy úırekterdiń atalyǵyn aýlaýǵa ańshylyq maýsymy bastalady.
«Ańshylar ózderimen birge ańshy kýáligin jáne ańshylyq sharýashylyǵynyń joldamasyn nemese janýarlar álemin paıdalanýǵa berilgen ruqsat qaǵazyn, atys qarýyn saqtaýǵa jáne ustaýǵa ruqsat qaǵazyn, sondaı-aq jyrtqysh qustardy aýlaǵan jaǵdaıda – jyrtqysh qustardy aýlaýǵa arnalǵan pasportty alyp júrýi qajet. Úırekterdiń atalyǵyn aýlaý urǵashy úırektiń tulybyn qoıý arqyly júzege asyrylady.
Sondaı-aq ań aýlaý jáne balyq aýlaý erejelerin buzý úshin kózdelgen ákimshilik jáne qylmystyq jaýapkershilikti esten shyǵarmaýdy, zańnyń talaptaryn qatań saqtaýdy suraımyz», – deıdi polıtsııanyń tabıǵatty qorǵaý tobynyń erekshe tapsyrmalar jónindegi aǵa ınspektory Ashat Qojabaev.
SQO polıtseıleri jyl basynan ań aýlaýdyń – 373, balyq aýlaý erejelerin buzýdyń 95 deregin anyqtady. Sonymen qatar zańsyz ańshylyqtyń 6 faktisi tirkeldi. Balyqty zańsyz aýlaý faktisi boıynsha bir qylmystyq is qozǵaldy.
