SQO-da polıtseıler áıelge 2,5 mln teńge alımentti óndirip alýǵa kómektesti
PETROPAVL. QazAqparat – Soltústik Qazaqstan oblysynda eki balanyń anasy polıtseılerdiń kómegimen burynǵy kúıeýiniń alıment boıynsha birneshe jylǵy bereshegi - 2,5 mln teńge alımentti óndirip aldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, vedomstvo basshysy Marat Tólebaevtyń atyna 8 ben 10 jastaǵy balalardyń anasy, Petropavl turǵynynan alǵys hat kelip tústi. Burynǵy kúıeýi oǵan 2,5 mln teńge alıment tóleýden jaltarǵan. Áıel bereshekti qatarý úshin áreket etkenimen onysynan túk shyqpaǵan.
Eki balanyń anasyna Petropavl qalalyq polıtsııa basqarmasy bastyǵynyń orynbasary Gúlmıra Saǵıtovaǵa kómekke keldi. Qońyraý shalǵan áıelden máseleniń mán-jaıyna qanyqqan polıtsııa maıory osy jaǵdaı boıynsha ótinishpen Ekinshi polıtsııa bólimine júginý qajettigin túsindirgen.
Nátıjesinde QR Qylmystyq kodeksiniń «Balalaryn kútip-baǵýǵa arnalǵan qarajatty tóleý jónindegi mindetterdi oryndamaý, eńbekke qabiletsiz ata-analaryn, eńbekke qabiletsiz jubaıyn (zaıybyn) kútip-baǵýǵa arnalǵan qarajatty tóleýden jaltarý» baby boıynsha qylmystyq óndiris qozǵaldy. Polıtseıler jaýapsyz ákeniń jumys ornynan tabysy týraly anyqtama aldy. Er adamdy izdep taýyp, oǵan qylmystyq jaýapkershilik jaıly túsindirdi. Medıatsııa boıynsha taraptardyń tatýlasýyna baılanysty qylmystyq óndiris toqtatyldy. Jalǵyzilikti ana alıment alyp, balalarynyń kerek-jaraǵyna jumsady.
«Óz hatynda áıel onymen jeke jumys istegen Gúlmıra Saǵıtova men anyqtaý qyzmetkerleri - Erbol Qamıtov pen Sanjar Atajandy ataı otyra, Ekinshi PB barlyq ujymyna alǵys bildirdi. Atalǵan jaǵdaı - halyqpen tıimdi jumys isteýdiń jáne medıatsııa quraldaryn paıdalanýdyń jarqyn úlgisi. Qyzmetkerler óz mindetterin atqardy, al rızashylyq olarǵa odan ári qyzmet etýge serpin bereri sózsiz», - deıdi SQO PD bastyǵy Marat Tólebaev.
