SQO-da polıtseıler aıdalada adasqan Túrkistan oblysynyń eki turǵynyna kómektesti
PETROPAVL. QazAqparat – Soltústik Qazaqstan oblysynda Reseıden kele jatqan Túrkistan oblysynyń eki turǵyny adasyp ketip, tártip saqshylary olardyń qarǵa batqan kóligin shyǵarýǵa kómektesti, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, 1 naýryz kúni Túrkistan oblysynyń eki turǵyny Erkebulan Dúısenbaı men Maqsat Rústenov «Lada Priora» avtokóligimen Omby qalasynan elge jolǵa shyǵady. Elektrondy kartaǵa sengen olar Ǵabıt Músirepov aýdany aýmaǵynda «Jezqazǵan-Petropavl» tas jolynyń 593 shaqyrymynda jolda qalady. Internet-servıs qoldanysta basqa joldyń barlyǵyn kórsetpegen. Saldarynan jeńil kólik tizeden keletin oppa qarǵa batyp, jigitterge «112» kanalyna habarlasýdan basqa amal qalmapty.
Oqıǵa ornyna patrýldi polıtsııa batalonynyń qyzmetkerleri Janblat Nuǵymanov pen Dıdar Dúıselekov attanady. Qastaryna Lomonosov aýyldyq okrýginiń ýchaskelik ınspektory Azamat Syzdyqovty alady. Bir jarym saǵat júrgennen keıin tártip saqshylary eki oblystyń shekarasyna taman jaqqan otty kóredi.
«Patrýldik avtokólik «Ladany» súırep shyǵara almady. Bizdiń qyzmetkerler «Drýjba» JShS kómek surady. Sharýashylyqtan jetken «ÝAZ» jeńil kólikti shyǵaramyn dep ózi batyp qaldy. Seriktestiktiń dırektory Qabıden Úsenov «John Dir» traktoryn berip, tehnıka eki kólikti tas jolǵa súırep shyǵardy. Oblystyń sharýashylyqtary qajet jaǵdaıda kómekterin aıamaıdy. Buǵan deıin de olardyń tehnıkasymen jolda qalǵan talaı júrgizýshige kómektestik», - deıdi SQO PD PPB komandıriniń orynbasary Ýálıhan Orazalın.
Bir táýlikke jýyq jol taýqymetin tartqan Túrkistan oblysynyń turǵyndaryn tártip saqshylary erteńine tań ata jol kórsetip, shyǵaryp saldy.
Jeksenbi kúni polıtseılerdiń kómegi Qostanaı oblysynyń turǵyny Borıs Abrosımovke de qajet boldy. Onyń «Mercedes» júk kóligi «Nur-Sultan-Petropavl» tas jolynyń 341 shaqyrymynda synyp qalǵan. Jolda turǵan mashınany kórgen patrýldi polıtseıler Dmıtrıı Kravchenko men Asqat Kamalıev toqtap, jaǵdaıyn suraıdy. Mán-jaıdy bilgennen keıin jaqyn mańdaǵy avtoqosalqy bólshekter satatyn dúkenge jetkizip, kóligin jóndeýge kómektesti. Saparyn jalǵastyrǵan Qostanaı oblysynyń turǵyny polıtseılerge rızashylyǵyn bildirdi.
