SQO-da polıtseıler aıazdyń kúsheıýine baılanysty alys jolǵa shyqpaýdy eskertti
PETROPAVL. QazAqparat – Soltústik Qazaqstan oblysynda qatty aıazǵa baılanysty keshe barlyq baǵyttaǵy avtokólik joldary jabylyp, búgin ǵana ashyldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, óńir joldarynda patrýldik polıtsııanyń 15 ekıpajy qyzmet atqaryp júr. Oblys aýmaǵynda birneshe kúnnen beri óatty aıaz, aýa temperatýrasy 30 gradýstan tómendedi. Osyǵan baılanysty 2 qańtar saǵat 17.00-den bastap barlyq baǵyttaǵy joldarda kólik qozǵalysy shekteldi. Búgin aıaz synǵannan keıin saǵat 11.00-den bastap joldar ashyldy. Alaıda dızelmen júretin kólikter men qoǵamdyq kólikter úshin qala mańyndaǵy tas joldarda qozǵalys shektelgen.
Polıtseıler táýlik boıy joldarda kezekshilik atqaryp júr. Demalys kúnderi olar Daewoo avtokóliginiń júrgizýshisine kómektesti. Taıynshanyń turǵyny otbasymen Smırnov eldimekeninen úıine qaıtyp kele jatqan. Jolda onyń kóligi synyp qalady. Kómekke birden patrýldik polıtsııa batalonynyń ofıtserleri Arman Oralov pen Dmıtrıı Kravchenko kómekke kelip, mashınany aýdan ortalyǵyna deıin súırep apardy. Prahtıı otbasy aman-esen úıine jetti. Kólikte 4 jáne 6 jastaǵy balalar da bolǵan.
«Aıazdan kóliktiń maıy aǵyp ketti ǵoı deımin. Biraq men tipti ne bolǵanyn baıqap ta úlgermedim, polıtsııa qyzmetkerleri kómekke keldi. Olarǵa kóp rahmet», - deıdi Roman Prahtıı.
Polıtseıler qatty aıazda uzaq jolǵa shyǵýdy keıinge qaldyrýdy suraıdy.
