SQO-da polıtseıler adasyp ketken reseılik júrgizýshini qutqardy
PETROPAVL. QazAqparat – Soltústik Qazaqstan oblysynda tártip saqshylary jolda qalǵan reseılik júrgizýshige kómektesti, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, Reseı Federatsııasynyń azamatshasy 1 qańtardan 2 qańtarǵa qaraǵan túni óz avtokóligimen Aıyrtaý aýdanynda adasyp ketedi. Ol Ǵ.Músirepov aýdanyndaǵy Rýzaevka eldi mekenine qonaqqa shyqqan eken. Reseılik telefon nómirinen júrgizýshi tek «112» nómirine ǵana habarlasa alyp, ondaǵy operatorlar «102-ge» tańǵy saǵat 5.30 mınýtta aqparatty bergen.
«Reseılik azamatsha óziniń qaı jerde turǵanyn túsindirip aıta almady. Tek tańǵy saǵat 8.00-der shamasynda ǵana ótip bara jatqan júk kóliginiń júrgizýshisi áıeldiń Aryqbalyq eldi mekeninen 10 shaqyrymdaı jerde turǵanyn aıtty. Aryqbalyq aýyldyq okrýginiń ýchaskelik ınspektory jergilikti JShS baryp kómek surap, traktorshymen birge oqıǵa ornyna jetti», - dedi Aıyrtaý aýdandyq polıtsııa bóliminiń basshysy Abylǵazy Gabdýllın.
Traktor júrgizýshisi joldy ashyp, reseılikti aýdan ortalyǵy Saýmalkólge deıin shyǵaryp saldy. Polıtseıler ári qaraı kólik júrgizýshisine Ǵ.Músirepov aýdanyna jol siltep jiberdi.
Mereke kúnderi SQO-da 140-tan astam polıtseı, ıaǵnı patrýldi polıtsııanyń 40 ekıpajy jáne 30 jaıaý jasaq kezekshilik etedi. Olar qoǵamdyq tártipti qadaǵalap, qaýipsizdikti qamtamasyz etedi, azamattarǵa kómek beredi. Merekeniń alǵashqy kúnderi tártip saqshylary qar qursaýynda qalǵan ondaǵan adamǵa kómek kórsetti.
