SQO-da polıtseıler 4 kúnniń ishinde turmysy nashar 400 otbasyn tekserdi
PETROPAVL. QazAqparat – Soltústik Qazaqstan oblysynda «Turmys» jedel-aldyn alý is-sharasy aıasynda polıtseıler turmysy nashar 400 otbasyn tekserdi, dep habarlaıdy QazAqparat tilshisi
SQO polıtsııa departamenti baspasóz qyzmetiniń málimetinshe, Petropavldaǵy qalalyq polıtsııa bólimshesine apaly-sińlili ekeý kelgen. Olardyń biri tıisti qujattardy toltyrý úshin, ekinshisi oǵan serik bolyp kelgen. Tártip saqshylarymen áńgime barysynda kelinshekter jylap, mán-jaıdy aıtyp bergen.
36 jastaǵy áıel birge turatyn er adammen ursysyp, dalada qalǵan. Al ol 5 aılyq sábıdi aýylǵa alyp ketken. Áıel ne turatyn jeriniń, ne jumysynyń joqtyǵyn aıtyp shaǵymdanǵan.
Jergilikti polıtsııa qyzmeti bóliminiń qyzmetkerleri qıyn jaǵdaıǵa dýshar bolǵan kelinshekke kómektespek boldy. «Analar úıimen» kelisip, ornalastyryp, kelesi kúni er adamnyń ruqsatymen sábıin ákelip berdi. Áıel «Analar úıinde» eki apta turyp, jumysqa ornalasty, jalǵa baspana aldy. Alaıda ol kóp uzamaı araq iship, birge turatyn er adam balany qaıta aýylǵa áketti. Endi bul jup polıtseılerdiń baqylaýynda.
26 aqpan men 1 naýryz aralyǵynda ótken «Turmys» jedel-aldyn alý is-sharasynyń maqsaty osyndaı otbasylardy nazarda ustap, qylmystyń jasalýyna jol bermeý.
«Operatsııa barysynda bizde esepte turǵan 4 myńnan astam adam turǵylyqty meken jaılary boıynsha tekserildi. Olardyń shamamen 2,5 myńy – maskúnemder. 507-si nashaqor bolsa, 410-y turmysy nashar otbasy. Osy aralyqta 651 ákimshilik quqyqbuzýshylyq anyqtaldy. Eń kóbi – qoǵamdyq oryndarda ishimdik ishý jáne mas kúıde júrý», - deıdi SQO JPQB bastyǵy Aıdyn Baımatov.
