SQO-da polıtseı órtengen úıden úsh adamdy qutqardy
PETROPAVL. QazAqparat - Soltústik Qazaqstan oblysy Jambyl aýdany Presnovka aýylynda polıtsııa serjanty Baýyrjan Surypkelov otqa oranǵan úıden anasy men eki balasyn alyp shyqty, dep habarlaıdy QazAqparat tilshisi SQO ІІD baspasóz qyzmetine silteme jasap.
Aýyldaǵy úılerdiń biri keshe keshke órtke oranǵan. Jalyn monshadan shyǵyp keıinnen úıge jalǵasqan. Úıde otaǵasyn áıeli, 10 jastaǵy qyzy men 4 jasar uly kútip otyrǵan. Іshtegiler sońǵy ýaqytqa deıin jaǵdaılarynyń múshkil ekenin sezbegen.
«Jambyl aýdandyq ІІB kezekshisiniń 24 jastaǵy kómekshisi, polıtsııa serjanty Baýyrjan Surypkelov kórshi úıde tútinniń shyǵyp jatqanyn baıqap qalǵan. Budan keıin quqyq qorǵaýshy jedel túrde órt sóndirýshilerge habar berip, Vladımır Hramov atty kórshisimen birge otbasyn úıden alyp shyqqan. Osy kezde aýyldastar órtengen úıdiń mańyna jınalyp, sý tasyp, tilsiz jaýdyń úıdi sharshyp ketýiniń aldyn alǵan. Oqıǵa ornyna kelgen órt sóndirýshiler jalyndy birjolata sóndirdi», - delingen habarlamada.
Qaýipten aman qalǵan otbasy men aýyldastary Baýyrjanǵa alǵysyn aıtyp jatyr.
«Menen góri kórshimiz Vladımır Aleksandrovıchti batyr deý kerek. Birge júrip, der kezinde qaýiptiń betin qaıtarýǵa kúsh saldy. Al men ıyqtaǵy shenim eń aldymen adamdarǵa kómek berý úshin taǵylǵanyn umytpaımyn», - deıdi Baýyrjan Surypkelov.
Baýyrjan Surypkelovtyń tártip saqshylyǵynda júrgenine bar-joǵy 3 jyl ǵana bolǵan. Áriptesteri Baýyrjannyń jaýapkershiligi mol ekenin aıtady.
