SQO-da polıtseı áıelder erekshe sýret galereıasyn uıymdastyrdy
PETROPAVL. QazAqparat – Soltústik Qazaqstan oblysynda halyqaralyq áıelder kúnine oraı polıtsııada qyzmet atqaratyn qyz-kelinshekter erekshe sýret galereıasyn uıymdastyrdy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, ıdeıanyń avtory - polıtsııa departamenti basshylyǵy. Polıtsııa qyzmetkerleri ózderiniń bar shyǵarmashylyq qabiletterin ortaǵa saldy: otandyq jáne álemdik sýretshilerdiń qylqalamynan týyndaǵan keıipkerlerdiń kostıýmderi men beınelerin dál keltire otyra, sońǵy apta boıy olar fotosessııa ótkizdi. Oǵan 13 qyz-kelinshek qatysty. Arasynda polıtsııa podpolkovnıgi de bar.
Ózderine unaıtyn beıneni tabý úshin qatysýshylar álemdik mádenıettiń jaýhary – júzdegen kartınany qarap shyqty. Nátıjesinde Qaıta órkendeý dáýirinen bastap, osy kúnge deıingi eńbekter tańdap alyndy.
Máselen ıývenaldyq polıtsııanyń aǵa ınspektory Erkegúl Basybaeva Leonardo da Vınchıdiń «Mona Lıza» nemese «Djokondasy» beınesinde sýretke tústi. Ákimshilik polıtsııa basqarmasynyń aǵa ınspektory Janna Úmbaevaǵa da Renessans dáýiri jaqyn bolyp shyqty. Ol «Elızabet Gonzalonyń portreti» kartınasyn tańdap, sol beınede sýretke tústi.
Joba aıasynda qazaq qyzdarynyń sulýlyǵyn kórsetýdi maqsat etkender de boldy. Olar otandyq qylqalam sheberleriniń eńbekterin tańdady. Petropavl qalalyq polıtsııa basqarmasynyń shtab ınspektory Aısulý Kajıkova «Qyzyl qamzol kıgen qyz» kartınasyn negizge aldy.
Erekshe sýret galereıasyn uıymdastyrýǵa at salysqandardyń aıtýynsha, jobaǵa qajetti kıim-keshekpen jáne grımmen jergilikti teatrlar men oblystyq fılarmonııa kómektesken. Rekvızıtterdi de izdeýge týra keldi. Osydan 70 jyl burynǵy oryndyqtardy tabý ońaı bolmapty. Al sýretterdiń birindegi maımyl «Madagaskar» oıyn-saýyq ortalyǵynyń zooparkinen alyndy.
Shyńarmashylyq jobanyń nátıjesi kóptiń kóńilinen shyqty.
