SQO-da polıatlonnan el chempıonaty bastaldy
PETROPAVL. QazAqparat – Soltústik Qazaqstan oblysynda polıatlonnan el chempıonaty ótip jatyr, dep habarlaıdy QazAqparat tilshisi.
Petropavlda polıatlonnan ótip jatqan el chempıonatyna respýblıkanyń 7 óńirinen kelgen sportshylar qatysqan. Olar birneshe kún boıy sporttyq kópsaıystyń túrlerinen: aýyr atletıka, qashyqtyqqa atý, jyldamdyqqa júgirýden básekelesedi. Búgin sportshylar shańǵy rollerimen synǵa tústi.
Soltústikqazaqstandyq Bekbolat Tılevov oblystyq quramanyń múshesi. 21 jastaǵy jigittiń kópsaıysqa kelgenine 4 jyl. Soǵan qaramastan aıtarlyqtaı nátıjesi bar. Ol kóptegen oblystyq, respýblıkalyq jarystardyń jeńimpazy.
Taǵy bir soltústikqazaqstandyq sportshy Vasılıı Podmogılnyı 61 jasta.
Vasılıı polıatlonnan Qazaqstannyń birneshe dúrkin chempıony.
«Sportshylar jaqsy daıyndyqpen kelgen eken. Tartysty ótip jatyr.
Jalpy 10 jyldan artyq bizdiń qurama Qazaqstan boıynsha kópsaıystan kósh bastap tur. Bıyl da jeńiske jetetinimizge senimdimin. Tek óńirde jattyǵý úshin arnaıy joldar joq. Osy másele sheshilse, sporttyń bul túrine kelýshiler kóbeıer edi», - deıdi Vasılıı Podmogılnyı.
Jalpy bul jarysqa 10 men 75 jas aralyǵyndaǵy sportshylar qatysýda.
«Jigitter 10 km, qyzdar 5 km, egde jastaǵy adamdar 3 km joldy júgirip ótedi. Jarys joǵary deńgeıde ótip jatyr. Qatysýshylardyń ishinde 25 sport sheberi, onyń ishinde 2 halyqaralyq dárejedegi sport sheberi bar. SQO-dan 2 qurama komanda qatysýda», - deıdi SQO-nyń bas jattyqtyrýshysy Aleksandr Naýmov.
Jarys qorytyndysy boıynsha jeńimpazdar shańǵy rollerinen ótetin Álem chempıonatyna joldama alady.
