SQO-da pırotehnıkalyq zattardy ruqsatsyz satqandarǵa ákimshilik jaza qoldanyldy
PETROPAVL. QazAqparat – Soltústik Qazaqstan oblysynda «Pırotehnıka» jedel-profılaktıkalyq is-sharasy ótip jatyr. Nátıjesinde 124 reıd uıymdastyrylyp, 6 ákimshilik hattama toltyryldy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń habarlaýynsha, mereke qarsańynda pırotehnıka dúkenderi men bazarlarda saýda qyzý júrip jatyr. Soltústikqazaqstandyqtardyń arasynda túrli feıerverkter men petardalar suranysqa ıe. Alaıda bul ónimderdi durys paıdalanbaǵan jaǵdaıda densaýlyqqa tıgizer zııany mol, tipti adam ómirine qaýip tóndirýi múmkin. Jańa jyl meıramy tynysh ótý úshin óńirdiń Tótenshe jaǵdaılar basqarmasynyń qyzmetkerleri jylda jedel-aldyn alý is-sharalaryn ótkizedi.
«Óńir turǵyndary men qonaqtaryn pırotehnıkalyq buıymdardy tek arnaıy dúkenderden satyp alý kerektigin eskertemiz, buıymnyń qaptamasynyń búlinbegenine nazar aýdaryńyzdar. Sondaı-aq ónimniń jaramdylyq merzimine de kóńil bólgen jón», - deıdi SQO TJD Zilzalalardyń qaýip-qaterin azaıtý jáne azamattyq qorǵaý salasyndaǵy baqylaý basqarmasynyń aǵa ınjeneri Ásel Súıindikova.
Departament mamandary sondaı-aq pırotehnıkany 14 jastan kishi balalardyń qolyna bermeýdi, radıýsy 50 metr aýmaqta kedergi joq ekenine kóz jetkizip jáne qoldy sozǵan kúıi ǵana feıerverkti jaǵýǵa bolatynyn eskertedi. Pırotehnıkany sondaı-aq qatty jel ótinde iske qosýǵa bolmaıdy.
Eger ol jumys istemese, ónimdi qaıtadan jaǵýdyń qajeti joq.
«Adamdar men janýarlarǵa ot shashýdy baǵyttamańyz, petardany aıaqqa laqtyrmańyz. Turǵyn úıler men pırotehnıkany iske qosatyn alańnyń qashyqtyǵy eń keminde 50 metr bolsyn. Ári bul alańda aǵashtardyń, elektr jelileriniń, basqa da kedergilerdiń bolmaǵany jón», - dep eskertedi Ásel Súıindikova.
Buǵan deıin pırotehnıkalyq buıymdardy tıisti ruqsat qujattarynsyz satqandarǵa ákimshilik jaýapkershilik qarastyrylǵanyn aıtqan edik. Búgingi kúnge Petropavlda 124 reıd uıymdastyrylyp, 6 ákimshilik hattama toltyryldy.
