SQO-da pırotehnıkalardy zańsyz satýshylardy mobıldi toptar anyqtaıdy

PETROPAVL. QazAqparat – Soltústik Qazaqstan oblysynda «Pırotehnıka» respýblıkalyq jedel-profılaktıkalyq is-sharasy aıasynda sertıfıkattalmaǵan pırotehnıkalyq ónimderdi anyqtaıtyn mobıldi toptar quryldy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, jańajyldyq mereke qarsańynda polıtseıler men qutqarýshylar jazataıym oqıǵalardyń jáne órttiń aldyn alý boıynsha jumysty jandandyrdy. Oblystyń tártip saqshylary reıdke 15 jeltoqsannan kirisken. Maqsaty – pırotehnıkalyq zattardy zańsyz satý faktilerin anyqtaý jáne olardyń satylýyna jol bermeý. Sertıfıkattalmaǵan pırotehnıkalar satatyn oryndarǵa reıdter júrgizetin mobıldik toptar quryldy.

Petropavlda sertıfıkattalǵan ónim eki saýda ornynda Sútishev jáne Jumabaev kóshelerindegi saýda úıleriniń mańyndaǵy pavılondarda satylady. Pırotehnıkalyq ónimderdi zańsyz satýy múmkin basqa oryndardy reıdik toptar tekseredi.

«Ata-analardan kámeletke tolmaǵan balalardy qadaǵalap, jasóspirimderdiń pırotehnıkalyq ónimderdi ózdiginen paıdalaný faktilerine jol bermeýlerin suraımyz. Mundaı ónimderdi tek eresekterge ǵana nusqaýlyqtar men barlyq qaýipsizdik sharalaryn qatań saqtaı otyra, paıdalanýǵa bolady», - deıdi SQO Polıtsııa departamenti Ákimshilik polıtsııa basqarmasynyń bastyǵy Serik Áljanov.

«Pırotehnıka» jedel-profılaktıkalyq is-sharasy qańtardyń ortasyna deıin jalǵasady.