SQO-da pedıkýlezdi juqtyrý 58 paıyzǵa azaıdy
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, pedıkýlezdi byltyr 109 adam juqtyrsa, bıyl 63 adamda bıt anyqtalǵan. Shamamen eki ese azaıǵanymen, bul dert áli de qaýipti bolyp otyr.
«Pedıkýlez - adamnyń keń taralǵan parazıttik aýrýy, onyń qozdyrǵyshy qan soratyn jándik - bıtter. Aýrý turmystyq jáne jynystyq qatynastarda, naýqastyń zattaryn qoldanǵan kezde juǵady.
Birinshi belgisi - qyshý, bul qan sorý kezinde bıtterdiń terige engizgen silekeıine allergııalyq reaktsııa.
Naýqasta pedıkýlezdi emdeý epıdemııaǵa qarsy is-sharalarmen bir mezgilde júzege asyrylýy tıis, ıaǵnı bas kıimderdi, kıimderdi, tósek-oryn jabdyqtary men úı-jaıdy dezınsektsııalaý qajet. Jándikter parazıtterge qarsy quraldarmen joıylady. Naýqastyń denesin ǵana emes, onyń zattaryn da óńdeý qajet. Sirkelerdi kıimnen, tósek-orynnan, jeke zattardan jáne jıhazdan alyp tastaý kerek. Ádette naýqastyń denesindegi bıtterdi óltirý qıyn emes. Shashtan barlyq sirkelerdi alyp tastaý áldeqaıda mańyzdy. Sonymen qatar, ınfektsııanyń kózin anyqtaý qajet», - deıdi dárigerler.
Mamandardyń aıtýynsha, pedıkýlezdiń aldyn alýǵa bolady. Ol úshin oıyn, basqa da is-shara kezinde basty basqanyń basyna jaqyndatpaǵan jón. Bireýdiń bas kıimin, sharfyn, taraǵyn, qulaqqaptar jáne shash aksessýarlary sııaqty jeke zattaryn paıdalanýǵa bolmaıdy. Kıimdi ortaq shkafta saqtaýdan aýlaq bolý qajet. Jeke gıgıenany saqtap, apta saıyn tósek-oryndy, kúndelikti ish kıimdi aýystyrý mańyzdy.
«Eger balanyń shashynda sirke bolsa, bul onyń pedıkýlezben aýyrǵanyn bildirmeıdi. Eger sirke shashtyń túbinen 7 mm-den alys bolsa, onda olar bos jáne bıt dernásilderi joq bolýy múmkin. Alaıda, eger balanyń shashynda kem degende bir bıt nemese shashtyń túbinde ornalasqan bir sirke bolsa, onyń pedıkýlez juqtyrǵany.
Bıt juqtyrǵan jaǵdaıda tıisti em taǵaıyndaý úshin dereý medıtsınalyq kómekke júginý qajet», - deıdi mamandar.