SQO-da pedıkýlez juqtyrǵandar sany ótken jylǵa qaraǵanda eki ese azaıdy

PETROPAVL. QazAqparat – Soltústik Qazaqstan oblysynda bıyl pedıkýlezben aýyrýdyń 48 jaǵdaıy tirkeldi, bul ótken jyldyń uqsas kezeńimen salystyrǵanda eki esege az, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, óńirde bıyl pedıkýlezben aýyrǵandardyń 21-i - 14 jasqa deıingi bala.

«Pedıkýlez - adamda keń taralǵan parazıttik aýrý, onyń qozdyrǵyshy qan soratyn jándik - bıt. Aýrý turmystyq jáne jynystyq qatynastarda, naýqastyń zattaryn qoldanǵanda juǵady. Birinshi belgisi - qyshý, bul qan sorý kezinde bıtterdiń terige engizgen silekeıine allergııalyq reaktsııa. Naýqasta pedıkýlezdi emdeý epıdemııaǵa qarsy is-sharalarmen bir mezgilde júrgizilýi tıis. Naýqastyń denesin ǵana emes, onyń zattaryn da óńdeý qajet. ıA ǵnı bas kıimderi, kıimderi, tósek-orny men úı-jaı dezınsektsııalanýy tıis. Ádette naýqastyń denesindegi bıtterdi óltirý qıyn emes. Deneden de, zattardan da barlyq sirkelerdi alyp tastaý áldeqaıda mańyzdy. Sonymen qatar, ınfektsııanyń kózin anyqtaý jáne ony qaıta juqtyrmas úshin emdeý kerek», - deıdi departamenttiń bas mamany Aınash Saǵandyqova.

Mamannyń aıtýynsha, pedıkýlezdiń aldyn alýǵa bolady. Ol úshin birqatar erejeni esten shyǵarmaǵan jón.

«Kıim men jeke zattardy basqaǵa paıdalanýǵa bermeý, kıimdi ortaq shkaftarda saqtamaý, jeke gıgıenany umytpaý, apta saıyn tósek-oryn jáne kúndelikti ish kıimdi aýystyrý, basseınde rezeńke qalpaq qoldaný jáne bıt juqtyrǵan jaǵdaıda tıisti em taǵaıyndaý úshin dereý medıtsınalyq kómekke júginý qajet. Bıtterdiń berilýiniń barlyq joldaryn joıý múmkin emes. Eger balanyń shashynda sirke bolsa, bul onyń pedıkýlezben aýyrǵanyn bildirmeıdi. Eger sirke shashtyń túbinen 7 mm-den alys bolsa, onda ol bos jáne bıt dernásilderi joq bolýy múmkin. Alaıda, eger balanyń shashynda kem degende bir bıt nemese shashtyń túbinde ornalasqan bir sirke bolsa, ony pedıkýlez juqtyrǵan dep sanaý kerek», - deıdi Aınash Saǵandyqova.

Sanıtar dárigerdiń aıtýynsha, basta bolatyn pedıkýlez qyshyp, adamnyń mazasyn alǵany jáne bas terisiniń qaıtalama ınfektsııasyn týdyrǵany bolmasa asa qaýipti emes.

Al kıim bıti - súzek ınfektsııasynyń tasymaldaýshysy bolýy múmkin, biraq ol búginde óte sırek kezdesedi.

Negizinen jıi jýynyp, taza kıim kııýge múmkindigi joq adamdarda bolýy múmkin. Súzek kezinde dene qyzýy kóterilip, bórtpe paıda bolady.

Mundaıda ınfektsııalyq dárigerge kórinip, medıtsınalyq mekemede em alý qajet.

Foto: pediatrichairsolutions.com