SQO-da paıdalanylǵan jáne ıesiz jatqan ýran kenishteri jergilikti ákimdikterdiń menshigine ótti
PETROPAVL. QazAqparat – Soltústik Qazaqstan oblysynda jergilikti turǵyndardyń ómiri men densaýlyǵyna qaýip tóndirgen burynǵy ýran kenishteri aýyldyq okrýg ákimdikteriniń balansyna ótti, dep habarlaıdy QazAqparat tilshisi.
SQO Ekologııa departamentiniń basshysy Azamat Bektasovtyń aıtýynsha, óńirde ıgerilgen ýran ken oryndarynyń sany altaý. Olardyń «Grachev», «Kosachınnoe», «Dergachevskoe» dep atalatyn úsheýi Aıyrtaý aýdanynda, qalǵany – Shoqpaq, Aqan-Burlyq kenishi jáne Toqsan bı aýylynyń mańynda ornalasqan ataýy joq kenish Ǵabıt Músirepov atyndaǵy aýdannyń aýmaǵynda ornalasqan.
«Bul ıgerilgen ýran ken oryndary kommýnaldyq menshikke qabyldanyp, aýyldyq okrýg ákimdikteriniń balansyna bekitildi. Ǵ.Músirepov atyndaǵy aýdan ákimdigi kenishtiń qorshaýlaryn qalpyna keltirip, radıatsııalyq qaýipsizdik belgilerin ornatý boıynsha jumystar júrgizdi. Aıyrtaý aýdanynda bul jumystar júrgizilgen joq. Jobalyq-smetalyq qujat jáne saraptama jasaý úshin «qorshaǵan ortany qorǵaý jónindegi is-sharalar» bıýdjettik baǵdarlamasy aıasynda Tabıǵı resýrstar jáne tabıǵat paıdalanýdy retteý basqarmasy arqyly jergilikti bıýdjetten qarajat bólý týraly másele sheshilip jatyr», - deıdi Azamat Bektasov.
Esterińizge salaıyq, paıdalanylǵan ýran kenishteriniń ıesiz jatqanyn aıtqan edik. Nysannyń aýmaǵynda aýzy ashyq qudyqtar bar, sondaı-aq munda radıatsııa mólsheri shamadan tys kóp. Qorshalyp, kúzetilýi tıis nysandardyń aýyldyqtar qorshaýlaryn buzyp áketken.
