SQO-da paıdalanylmaǵan 125 myń gektardan asatyn jer memleket menshigine qaıtaryldy

ASTANA. KAZINFORM —  Jyl basynan beri qadaǵalaý organy jalpy aýdany 125 myń gektardan asatyn 34 jer ýchaskesin maqsatyna saı paıdalanylmaǵanyn anyqtady.

— Aqjar, Tımırıazev, Ýálıhanov aýdandarynyń jer paıdalanýshylary Jer kodeksiniń talaptaryn buza otyryp, uzaq ýaqyt boıy aýyl sharýashylyǵy maqsatyndaǵy 34 jer ýchaskesin nysanaly maqsaty boıynsha paıdalanbaǵan. Qadaǵalaý aktileri boıynsha jalpy aýdany 8,3 myń gektardan asatyn, kadastrlyq quny 95,7 mıllıon teńge bolatyn 8 jer ýchaskesi qaıtaryldy, olar qazirgi ýaqytta zańdy ekonomıkalyq aınalymǵa tartylyp jatyr, - delingen Soltústik Qazaqstan oblysy prokýratýrasy habarlamasynda.

Qalǵan jer ýchaskeleri boıynsha olardy qaıtarý jumystary jalǵasyp jatyr.

Sonymen qatar jergilikti atqarýshy organdar Memleket basshysynyń 2024 jylǵy 2 qyrkúıektegi Joldaýy sheńberinde aýyldyq jerde turatyn adal nıetti sýbektilerge qaıtarylǵan jerlerdi paıdalanýǵa berýge baǵdarlanǵan.

Aıta ketelik Túrkistan oblysynda zańsyz berilgen jerler memleket menshigine qaıtarylǵan edi.