SQO-da patrýldik kólik aýdarylyp, eki polıtseı zardap shekti

PETROPAVL. KAZINFORM — Bul bir aptada Soltústik Qazaqstan oblysynda polıtseılerdiń qatysýymen bolǵan ekinshi oqıǵa. 

Áleýmettik jelide oqıǵa ornynan foto-beınejazba tarady. 

Kýágerlerdiń aıtýynsha, jol-kólik oqıǵasy Aıyrtaý aýdanynda bolǵan. Patrýldik kólik aýdarylyp, ishinde bolǵan eki tártip saqshysy jaraqat aldy. 

SQO densaýlyq saqtaý basqarmasy baspasóz qyzmetiniń málimetinshe, zardap shekkenderdiń biri 1980 jyly týǵan. 

— Jol-kólik oqıǵasy barysynda jaraqat alǵan. Sol jaq baltyryn soǵyp, basyn jyrǵan. Oń qoldyń alaqan tusynda kóptegen jara bar. Jalpy jaǵdaıy — qanaǵattanarlyq. Ambýlatorııalyq em taǵaıyndaldy, — dedi basqarmanyń baspasóz hatshysy Gúlnar Qalıeva.

Ekinshi zardap shekken tártip saqshysy 1988 jylǵy. 

— Aldyn ala dıagnoz boıynsha jabyq bas-mı jaraqatyn alǵan, mıy, moıyn omyrtqasy soǵylǵan. Sol qoldyń eki saýsaǵy synǵan. Jalpy jaǵdaıy aýyr. Qazir oblystyq kópbeıindi aýrýhanada jatyr, — dedi Gúlnar Qalıeva.

SQO polıtsııa departamenti ázirge bul oqıǵaǵa qatysty túsinik bergen joq.

Esterińizge salaıyq, osydan úsh kún buryn CQO-daǵy jol apatynan eki polıtseı kóz jumǵanyn jazǵan edik.