SQO-da páter urlyǵy azaıyp, qylmysty ashý kórsetkishi ósti
SQO polıtsııa departamenti baspasóz qyzmetiniń málimetinshe, qylmystyń eń kóp taralǵan túri – bótenniń múlkin urlaý. Ótken jyly oblysta 1444 urlyq jasaldy, bul 2021 jylmen salystyrǵanda 18,8%-ǵa az. Mal urlyǵy 31%-ǵa tómendedi. 2021 jyly – 29, ótken jyly 20 fakti tirkelgen. Polıtseıler muny aldyn alý jumystarymen baılanystyrady.
Páterde jasalatyn urlyq sany 32,4% azaıǵan. Polıtseılerge bul qylmystardy «izin sýytpaı» ashýǵa kóbinese beınebaqylaý júıesin keńinen qoldaný sep bolǵan. Turǵyndardyń kireberister men aýlalarda, kásipkerlerdiń saýda úı-jaılarynda jáne ǵımarattardyń aınalasyna ornatqan kameralarynan urylar seskenedi. Al páter urlyqtaryn ashý kórsetkishi 65,7-den 74,7%-ǵa deıin ósti.
«Bótenniń múlkin urlaý kóp jaǵdaıda alkogoldi asyra paıdalanýdan soń jasalady. Máselen, uıaly telefon kóp jaǵdaıda dámhanada nemese páterde birge otyryp spırttik ishimdik ishýden keıin urlanady. Áıtse de telefon urlyǵy azaıdy. 2021 jyly – 306, ótken jyly 231 fakti tirkeldi.
Múlkińizdi nemese zatyńyzdy urlatyp almaýdyń joly – qyraǵy bolý. Aqsha men basqa da qundy zattardy nazardan tys qaldyrmaý qajet. Olardy ishki qaltańyzda ustaǵan abzal. Qylmystyń jasalýyna jol bermes úshin zattardy kózge túsetin jerlerde qaldyrmaýǵa keńes beremiz. Sondaı-aq qujattar men baǵaly zattardy avtomobıl salondarynda qaldyrýǵa bolmaıdy. Mashınalardy jaryq jaqsy túsip turatyn, beınekameralar qamtıtyn aımaqtarǵa qoıý kerek», - deıdi SQO PD Krımınaldyq polıtsııa basqarmasynyń bastyǵy Marat Jumalıev.