SQO-da «Parasattylyq mektebi» ashyldy
Agenttik tóraǵasy Alık Shpekbaev Soltústik Qazaqstan oblysynda jumys saparymen júr. Buǵan deıin Aqqaıyń aýdanynyń ortalyǵy Smırnov eldi mekeninde «Ashyq ákimdik» front ofısiniń jáne Petropavl qalasynda Qazaqstandaǵy alǵashqy «Antikor ortalygy» servıstik ortalyǵynyń ashylýyna qatysty.
https://kaz.inform.kz/news/sko-da-ashyk-akimdik-front-kensesi-ashyldy_a3587307
M.Qozybaev atyndaǵy Soltústik Qazaqstan memlekettik ýnıversıtetiniń oqý korpýstaryn aralap, «Parasattylyq mektebiniń» ashylýynda boldy.
«Qoǵamda senim bolǵanda jáne sybaılas jemqorlyqpen barlyǵymyz jumyla kúreskende ǵana nátıje bolady. Ásirese jemqorlyqtyń aldyn alýǵa jastardy kóptep tartý qajet. «Parasattylyq mektebi» osy maqsatta jumys isteıdi», - dedi Alık Shpekbaev.
Oblys basshylyǵy da mundaı mekteptiń kóptep ashylǵanyn qoldaıdy.
«Búgin biz jergilikti ýnıversıtette «Parasattylyq mektebin» ashý arqyly jemqorlyqqa qarsy qozǵalysty bastaıtyn jańa formatsııadaǵy jastardy daıarlaımyz. Jazda oqý ornynyń stýdentteri Memlekettik basqarý akademııasynyń oblystyq fılıalynda «Parasattylyq mektebin» támamdady. Olar kýrs bitken soń akademııa fılıaly sarapshylarynyń mentorlyǵymen jobalaryn qorǵady. Osy jastarǵa senim artamyz. Olar joǵary oqý ornynda jemqorlyqqa qarsy saıasatty júzege asyrý kerek», - dedi oblys ákiminiń birinshi orynbasary Marat Tasmaǵanbetov.
Kompleans-ofıtser Natalıa Pobejýk akademııalyq adaldyqty qalyptastyrý boıynsha atqarylyp jatqan jumystarmen tanystyrdy. Onyń sózine qaraǵanda, M.Qozybaev atyndaǵy SQMÝ Akademııalyq adaldyq lıgasyn alǵashqylardyń biri bolyp qurdy. Ýnıversıtet 2018 jyldyń 7 qarashasynan bastap respýblıkadaǵy 12 ýnıversıtetpen qatar Lıgaǵa múshe.
Aıta ketý kerek, agenttik tóraǵasy oqý ornyna buǵan deıin de kelgen. Sońǵy saparynda oǵan stýdentterdiń ózine-ózi qyzmet kórsetý ortalyǵy, sondaı-aq «Sanaly urpaq» jobalyq keńsesi tanystyryldy.
