SQO-da «Parasatty otbasy» baıqaýynyń jeńimpazdary anyqtaldy
QR Sybaılas jemqorlyqqa qarsy is-qımyl agenttiginiń SQO boıynsha departamenti baspasóz qyzmetiniń málimetinshe, «Parasatty otbasy» baıqaýynyń ótkizilýine sybaılas jemqorlyqqa qarsy qyzmet pen Bilim basqarmasy muryndyq boldy. Onlaın ótken baıqaýǵa qatysýshylar beınerolıkter túsirip jiberdi. Jalpy óńirdiń barlyq aýdandarynan 48 otbasy qatysty.
«Bizdiń maqsatymyz – otbasylyq qatynastardy nyǵaıtý jáne onyń qundylyqtaryn nasıhattaý arqyly bala kezinen sybaılas jemqorlyqqa tózbeıtin, parasatty tulǵany qalyptastyrý. Qatysýshylar parasattylyq, adaldyq qaǵıdattaryna negizdelgen otbasylyq qundylyqtardy, sondaı-aq sybaılas jemqorlyqqa qarsy mádenıetti taný deńgeıin kórsetetin beınerolıkter usyndy. Mundaı is-sharalardy ótkizý otansúıgishtik sezimdi damytýǵa jaqsy áser etedi, óıtkeni Otanǵa degen súıispenshilik otbasynan bastalady», - deıdi Sybaılas jemqorlyqqa qarsy is-qımyl agenttiginiń SQO boıynsha departamenti basshysynyń birinshi orynbasary Nurlan Jahın.
Nátıjesinde Shal aqyn aýdanynyń ókilderi - Danılovtar otbasynyń shyǵarmashylyq jumysy joǵary baǵalandy. Bul otbasynyń tórt múshesi bar. Olar ádildik, adaldyq týraly aıtatyn beınebaıandy ázirleýge tórt kúnderin jumsapty. Al ekinshi oryndy qala turǵyndary – kópbalaly Ibraevtar otbasy jáne úshinshi oryndy Tımırıazev aýdanynyń turǵyndary – Lobanovtar otbasy ıelendi.
Jeńimpazdar men júldegerler gramotalar jáne syılyqtarmen marapattaldy. Sondaı-aq, jeńimpaz úsh otbasy músheleriniń balalary «Baldáýren» respýblıkalyq oqý-saýyqtyrý ortalyǵyna joldama aldy.
