SQO-da parany bergen adam da, alǵan adam da ustaldy
Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Tergeý departamenti bastyǵynyń orynbasary Baýyrjan Balǵabekov aıtty, dep habarlaıdy QazAqparat tilshisi.
«Sybaılas jemqorlyqqa qarsy is-qımyl ulttyq bıýrosynyń Soltústik Qazaqstan oblystyq departamenti keshendi arnaıy jedel-izdeý sharalarynyń nátıjesinde oblystyq ákimdikke qarasty «Qyzyljar orman sharýashylyǵy» KMM dırektorynyń para alý faktisin anyqtady», - dedi ol.
Onyń atap ótýinshe, mekeme dırektory ózi qaraýyndaǵy ormannan otyn kesýge ruqsat bergeni úshin jergilikti turǵynnan jalpy somasy 1 mln 231 myń teńge parany júıeli negizde alyp kelgen.
«Jergilikti turǵyn da laýazymǵa tulǵaǵa para berý kúdigine ilindi. Olar kinálaryn tolyqtaı moıyndaýyna baılanysty protsessýaldyq ustaý sharasy qoldanylǵan joq. Mekeme dırektoryna kepil túrindegi bultartpaý sharasy qoldanyldy. Tergeý amaldary júrgizilip jatyr», - dedi B.Balǵabekov.