SQO-da para bergen kolledj dırektory sottaldy

PETROPAVL. QazAqparat - Soltústik Qazaqstan medıtsınalyq kolledjiniń dırektory sybaılas jemqorlyq qylmys jasaǵany úshin sottaldy, dep habarlaıdy QazAqparat Sybaılas jemqorlyqqa qarsy is-qımyl agenttigine silteme jasap.

«Soltústik Qazaqstan oblysynyń sybaılas jemqorlyqqa qarsy qyzmeti «Soltústik Qazaqstan medıtsınalyq kolledji» ShJQ KMK dırektory M.B. Ahmetovaǵa qatysty para berdi degen kúdik boıynsha sotqa deıingi tergeýdi aıaqtady», delingen habarlamada.

Ol oblystyq TJD qyzmetkeri anyqtaǵan órtke qarsy qaýipsizdik erejesin buzý faktisi boıynsha ákimshilik jaýapkershilikke tartpaýy úshin kolledj farmatsevti M.T.Ábdikárimovanyń deldal bolýy arqyly 50 myń teńge para berdi degen kúdikke ilingen.

1 qarashada Petropavl qalalyq sotynyń úkimimen M.B. Ahmetova para bergeni, al M.T. Ábdikárimova para berýde deldaldyq jasaǵany úshin kináli dep tanyldy.

Sottalǵandarǵa 500 myń teńge jáne 250 myń teńge kóleminde aıyppul túrindegi jaza taǵaıyndaldy, sondaı-aq memlekettik qyzmette laýazymdy qyzmetpen aınalysý quqyǵynan ómir boıyna aıyryldy.