SQO-da para alý ústinde Jer kadastry departamentiniń basshysy ustaldy
ASTANA. QazAqparat - Sybaılas jemqorlyqqa qarsy is-qımyl ulttyq bıýrosynyń Soltústik Qazaqstan oblysy boıynsha departamenti oblystyq «Úkimet azamattar úshin» Memlekettik korporatsııasy Jer kadastry jáne jyljymaıtyn múlikti tehnıkalyq tekserý departamentiniń basshysy E.Abdrahmanovty ustady.
Abdrahmanov E. qol astyndaǵy qyzmetkerlerdiń birin jumystan shyǵaramyn dep qorqytsa, birine qyzmet baby boıynsha qamqorlyq kórsetetinin aıtyp, olardan júıeli túrde aqsha qarajatyn alyp kelgen.
Óziniń qylmystyq áreketterimen Abdrahmanov E. zańsyz túrde 1 500 000 teńge alǵany belgili boldy. Ol 250 000 teńge somasyndaǵy kezekti parasyn alý ústinde qolǵa tústi.
Qazirgi ýaqytta laýazymdy tulǵa Petropavl qalasyndaǵy ýaqytsha ustaý abaqtysyna qamaldy. Sotqa deıingi tergeý júrip jatyr.
