SQO-da para alǵan polıtseılerge úlken mólsherde aıyppul salyndy
SQO sybaılas jemqorlyqqa qarsy qyzmet para alý faktileri boıynsha SQO polıtsııa departamentiniń patrýldik polıtsııa batalonynyń qyzmetkerlerine qatysty qylmystyq ister boıynsha usynystardy onlaın rejımde qarady.
SQO Sybaılas jemqorlyqqa qarsy qyzmettiń basshysy Jarqyn Ǵalymovtyń aıtýynsha, 28 sáýir kúni Petropavl qalalyq soty polıtseıler A.Shnaıder men D.Baıjanbaevty kináli dep tapty. Olar jol erejesin buzǵan kólik júrgizýshilerin ákimshilik jaýapqa tartpaý úshin birneshe ret para alǵan. Sottyń úkimimen A.Shnaıderge 12 mln 950 myń teńge, D.Baıjanbaevqa 5 mln 525 myń teńge aıyppul salyndy. Olar «polıtsııanyń aǵa leıtenaty» arnaıy shenderinen jáne ómir boıyna memlekettik qyzmette laýazymdy jumysty atqarý quqyǵynan aıyryldy. Al olardyń sybaılasy – azamattyq tulǵa 200 myń teńge aıyppul tóledi. 28 mamyr kúni sot úkimi zańdy kúshine endi.
20 sáýir kúni sot patrýldi polıtsııa batalonynyń basqa taǵy eki qyzmetkerine úkim shyǵardy. E.Shılov pen R.Taıkenov kólik júrgizýshisin aldaý arqyly onyń 300 myń teńgesin alǵan. Olar mas kúıde ustalǵan júrgizýshige ákimshilik hattama toltyrmaǵan. Sot olardyń árqaısysyna 3 mln teńge aıyppul salyp, ómir boıyna memlekettik qyzmette, qarjymen baılanysty mekemelerde laýazymdy jumys isteý quqyǵynan aıyrdy.
25 mamyr kúni sot úkimi kúshine endi.
«Berilgen usynymdardyń nátıjesinde bul qyzmetkerler jumystarynan bosatyldy. Polıtsııa departamentiniń 12 laýazymdy tulǵasy tártiptik jaýapqa tartyldy, sonyń ishinde ekeýi ornynan alyndy.
Sharalar qoldanylyp jatqanymen PPB qyzmetkerleriniń arasynda sybaılas jemqorlyqqa jol berýshilik bar. Qazirgi ýaqytta departament para alýǵa qatysty taǵy bir isti sotqa deıin tergep jatyr. Joldyń qarsy betine shyǵyp ketken kólik júrgizýshisin ákimshilik jaýapqa tartpaý úshin polıtseıler para alǵan», - deıdi SQO Sybaılas jemqorlyqqa qarsy qyzmettiń basshysy Jarqyn Ǵalymov.
Mamandar qylmystardy saralaı kele, polıtseılerdiń portatıvti beınetirkegishteriniń tıisti deńgeıde baqylanbaıtynyn anyqtaǵan.
«PPB qyzmetkerleri para alý kezinde polıtseılerdiń jumys barysynda is-áreketin jazatyn jeke qyzmettik beınetirkegishterin sóndirip tastap otyrǵan. Tekserý kezinde belgili bir ýaqyttyń jazbalary bolmaǵan. Sondaı-aq aldyn ala belgilengen patrýldi-postyq narıadtan aýytqyp, negizsiz marshrýtty ózgertken.
Polıtseıler Shılov pen Taıkenov 20 naýryz kúni «Chelıabi-Novosibir» tasjolynyń 537-578 km aralyǵynda kezekshilik etýi qajet bolsa, olar bekitilgen ornalastyrýǵa qaramastan, Petropavl mańyndaǵy aınalma jolda saǵat 14.00-ge deıin júrgen. Osy ýaqyt aralyǵynda polıtseılerdiń avtokóliktegi statsıonarlyq kameralaryn jáne keýdedegi beınejetondaryn óshirgendigi sotqa deıingi tergeý barysynda anyqtaldy», - deıdi Jarqyn Ǵalymov.