SQO-da para alǵan eks-sheneýnikke 20 mln teńge aıyppul salyndy
PETROPAVL. KAZINFORM — Soltústik Qazaqstan oblysynda para alǵan sheneýnikke qatysty sot úkimi shyqty.
Esil aýdandyq sotynyń málimetinshe, laýazymdy tulǵa jeke kásipkerden 400 myń teńge para alǵan.
Tergeý barysynda anyqtalǵandaı, A. 2024 jyldyń qarashasynan bastap 2025 jyldyń qańtaryna deıin Esil aýdanynyń sáýlet, qurylys, turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy laýazymynda júrip, jeke kásipker K.-den aýdandyq mańyzy bar joldardy jazǵy kútip-ustaý jumystaryn oryndaý aktisine qol qoıǵany úshin syıaqy talap etken. Alynǵan qarajatty ol qolma-qol aqshaǵa aınaldyryp, jeke qajetine jumsaǵan.
Sotta aıyptalýshy óz kinásin tolyq moıyndap, jasaǵan isine ókinetinin aıtty. Memlekettik aıyptaýshy onyń áreketine baılanysty naqty bas bostandyǵynan aıyrý jazasyn taǵaıyndaýdy surady. Alaıda, sot A.-nyń buryn sottalmaǵanyn, jasaǵan isine ókinish bildirýin jáne oń minezdemelerin eskere otyryp, muny jeńildetetin mán-jaılar retinde qabyldady. Sonymen qatar sot aıyptalýshynyń memlekettik qyzmetker retinde ant pen kásibı mindetin buzǵanyn aýyrlatatyn jaıt retinde qarady.
Sot úkimimen A. kináli dep tanylyp, oǵan 20 mıllıon teńge kóleminde aıyppul salyndy. Budan bólek, ol ómir boıyna memlekettik qyzmette jumys isteý quqyǵynan aıyryldy. Qylmystyq jolmen alynǵan 400 myń teńge memleket kirisine tárkilendi.
Buǵan deıin SQO-da 7 qaýipti týrıstik nysan tirkelgenin jazǵan edik.