SQO-da para alǵan basqarma basshysy men oǵan para bergen adam da jazalandy
Petropavl qalalyq sotynda para aldy dep kúdiktelgen Soltústik Qazaqstan oblysy densaýlyq saqtaý basqarmasy basshysy Qabdrahman Saqtaǵanov pen oǵan para berdi dep ustalǵan «Densaýlyq» jeke kommertsııalyq emes mekemesiniń dırektory Aınagúl Qarabaevanyń isi qaralyp, sońǵy núktesi qoıyldy. Medıtsına qyzmetkerleri sybaılas jemqorlyqpen osydan shamamen bir aı buryn ustalǵanymen, istiń mán-jaıy osy kúnge deıin belgisiz bolyp keldi.
Paranyń mólsheri – 200 myń teńge. «Densaýlyq» mekemesiniń dırektory osynshama qarajatty basqarma basshysynyń kabınetine aparyp bergen. Tergeý barysynda bul qarajattyń oń sheshim qabyldanýy úshin usynylǵany anyqtaldy. Qarabaeva mekemesine jańadan kelgen úsh jas mamanǵa osylaısha áleýmettik tólem jasatpaq bolǵan. Óıtkeni máslıhattyń sheshimimen ústemaqy tek memlekettik mekemelerge ornalasqan mamandarǵa ǵana tıesili.
«Mekeme dırektory basqarma bul máseleni sheshýde qoldaý kórsetýi úshin hat jazǵan. Keıin másele oń sheshilýi úshin Saqtaǵanovtyń kabınetine kelip, jumys papkalarynyń birine 200 myń teńge salynǵan konvertti salǵan jáne ony óziniń zańǵa qaıshy áreket jasap jatqanyn eskertken. Saqtaǵanov konvertten 200 myń teńge kólemindegi aqshany alyp, ony óz ámııanyna salǵan, osylaısha óz menshigine aınaldyrdy», - deıdi SQO prokýratýra basqarmasynyń aǵa prokýrory Asylbek Qońyratov.
Sybaılas jemqorlyqqa qarsy qyzmet basqarma basshysyn sol kúni úıine kelgesin ustady. Para alýshy da, ony berýshi de óz kinásyn moıyndady.
Petropavl qalalyq sotynyń sýdıasy Dınara Baızaqova Qabdyrahman Saqtaǵanovke 5 mln 807 myń teńge mólsherinde aıyppul saldy. Buǵan deıin úı qamaqta otyrǵan eks-sheneýnik eshqaıda ketpeý jónindegi qolhatpen bosatyldy. Al Aınagúl Qarabaevaǵa 4 mln teńge aıyppul salyndy. Ekeýi de ómir boıyna laýazymdy qyzmetke ornalasý quqyqtarynan aıyryldy.
Qabdrahman Saqtaǵanov vedomstvony 2010-14 jyldar aralyǵynda basqardy. Ekinshi ret byltyr shilde aıynda taǵaıyndalǵan edi.
