SQO-da ózine tıesili aýmaqqa beıjaı qaraǵandar jazalanady
PETROPAVL. QazAqparat - Soltústik Qazaqstan oblysynyń ákimi aýmaǵyn shóp basqan uıymdardyń basshylaryna sońǵy eskertý jasady, dep habarlaıdy QazAqparat tilshisi.
SQO ákimdiginiń otyrysynda eldi mekenderdi jáne Petropavldy abattandyrý máselesi talqylandy. SQO ákimi baspasóz qyzmetiniń habarlaýynsha, Qumar Aqsaqalov ózine tıesili aýmaqty jónge keltirmegen jekemenshik jáne memlekettik organdardy qatty synǵa aldy.
«Oblys ortalyǵynda belýarǵa deıin shóp ósip tur. Turǵyn úı kooperatıvteri, kásipkerler men memlekettik uıymdar is-áreket jasaýǵa qulyq tanytar emes. Petropavlda shóp shabatyn jumysshylardyń sany az. Al qalada 1500 nysan bar. Kommýnaldyq qyzmetter joldan trotýarǵa deıin abattandyrady, al trotýardan úıge deıin jaýapkershilik úı ıeleri nemese kásipkerlerdiń moınynda», - dedi óńir basshysy.
Sondaı-aq oblys ákimi qurylys jáne jóndeý jumystary kezinde qoǵamdyq baqylaýdy kúsheıtý qajettigin aıtty. Áleýmettik jelilerdegi turǵyndardyń belsendiligi óńir basshysyn qýantyp otyr.
«Petropavldyqtar áleýmettik jeli arqyly jiberilgen qatelikterdi kórsetip otyrady. Bul durys, biz oǵan qulaq asa bilýimiz kerek. Turǵyndar monıtorıngke tartylsa, qoǵamǵa paıdasy tıedi. Sol sebepti qurylysshylar birden sapaly jasasyn. Kepildik merzimin ulǵaıtý kerek. Zerthanalar arqyly qurylys materıaldarynyń sapasyn tekserý qajet. Jaýapkershiligi tómen merdigerlerdi «qara tizimge» engizgen jón», - dedi oblys ákimi.
