SQO-da ózenderde muzdy jarýǵa 84 mln teńge jumsalady

PETROPAVL. KAZINFORM — Soltústik Qazaqstan oblysynda ózenderde muzdy jarý jumystary júrgizilip jatyr.

SQO Tótenshe jaǵdaılar departamentiniń málimetinshe, ózenderdegi muzdy usaqtaý — tasqyn sýdyń qaýipsiz ótýin qamtamasyz etýdiń tıimdi tásilderiniń biri. Bıyl bul jumys 16 naýryzda bastalyp, 21 naýryzǵa deıin jalǵasady. Mamandar Esil ózeninde, onyń salalarynda jáne oblystyń shaǵyn ózenderinde baqylap otyryp muzdy jarmaq.

— Esil ózeni men shaǵyn ózenderde jarylys jumystaryn júrgizý úshin Petropavl qalasynyń ákimdigi jáne taǵy jeti aýdan 84 mıllıon teńge bóldi. Bul muz keptelisteriniń aldyn alyp, sýdyń erkin aǵýyn qamtamasyz etedi, — dedi SQO TJD Tótenshe jaǵdaılardyń aldyn alý basqarmasynyń bastyǵy Áset Shaıkın brıfıngte.

Bul eldi mekenderdi, ınfraqurylym nysandaryn jáne aýyl sharýashylyǵy alqaptaryn sý basý qaýpin azaıtýǵa múmkindik beredi.

Qazirgi ýaqytta muzdy jarý jumystary Qyzyljar aýdany jáne Petropavl qalasy aýmaǵyndaǵy Esil ózeninde júrgizilip jatyr. 

«Qazgıdromet» kásipornynyń oblystyq fılıaly naýryz aıynan bastap óńirdegi ózenderdiń jaǵdaıyna baılanysty kúndelikti gıdrologııalyq bıýlleten ázirlep jatyr. Oǵan 27 gıdrologııalyq bekettiń kórsetkishteri engizilgen. Ázirge ózender muz qursaýynda jatyr. Aqanburlyq, Sharlyq ózenderinde muz qalyńdyǵy 80-88 sm shamasynda. Shaǵalaly ózeni túbine deıin qatyp, muz qalyńdyǵy 94 sm jetken. Esil ózeninde muz qursaý 82-51 sm aralyǵynda alyp jatyr.

Buǵan deıin Qostanaıda muz jarý jumystary júrgizilgenin jazǵan edik.