SQO-da ózender sýynyń kúrt kóterilýine baılanysty eskertý jarııalandy

PETROPAVL. KAZINFORM – Soltústik Qazaqstan oblysynda eki gıdrologııalyq bekette Esil men Qamysaqty ózenderiniń sý deńgeıi qaýipti mejege jaqyndap qaldy. Osyǵan oraı óńirde eskertý jarııalandy.

«Qazgıdromet» RMK SQO fılıalynyń málimetinshe, saǵat 16.00-degi gıdrologııalyq monıtorıng boıynsha tańǵy saǵat 8.00-den bastap osy ýaqytqa deıin Kreşenka eldi mekeni mańyndaǵy Esil ózeni birden 4 metrge kóterilgen. Qaýipti deńgeı 1400 sm, qazir 1389 sm-ge jetken.

Sondaı-aq ıAsnovka eldi mekeniniń janynan ótetin Qamysaqty ózeniniń sý deńgeıi qaýipti 720 sm-ge jaqyndap qaldy. Tańerteńnen beri 91 sm-ge kóterilip, 663 sm boldy.

Aıyrtaý jáne Esil aýdandarynyń alqaptarynan erigen qar sýy kelip jatyr, sonyń esebinen sý deńgeıi áli de kóterilmek. Qaýipti deńgeıden asqan jaǵdaıda ózenniń tómengi aǵysynda ornalasqan eldi mekenderdi, sharýashylyq qurylystaryn jáne avtojoldardy sý basý qaýpi bar.

Buǵan deıin SQO-da respýblıkalyq mańyzy bar avtomobıl jolynyń bes ýchaskesin sý shaıyp ketkenin aıtqan edik.

Sondaı-aq sý kirgen aýyldarǵa turaqtandyrý qorynan azyq-túlik jetkiziletinin habarladyq.