SQO-da ózdiginen ekpe jasaǵan turǵynnyń jaǵdaıy nasharlap, aýrýhanaǵa tústi

PETROPAVL. KAZINFORM – Petropavlda úıinde ekpe alyp, ınektsııa orny jaraǵa aınalǵan turǵyn dáriger kómegine júginýge májbúr boldy.

Petropavl qalalyq kópbeıindi aýrýhananyń málimetinshe, emdeý mekemesine jambasy isken jáne ózin jaısyz sezingen áıel tústi. Jarty jyl buryn ol úıinde ekpe qoıǵyzǵan, keıin orny tompıǵan. Turǵyn oǵan mán bermeı, aýyrmaǵan soń júre bergen. Al bir apta buryn ekpe ornynda aýyrsynýy kúsheıip, terisi qyzarǵan. Áıelde álsizdik paıda bolǵan.

- Syrqat basynda ózi úıde emdelgen – jaqpamaı jaqqan, qyzdyrǵan, nátıjesi bolmaǵan. Aýrýhanada qarap-teksergen kezde jambasynda flegmona anyqtaldy. Hırýrgtar ony kesip, jýyp, drenaj qoıdy – shamamen 30 ml iriń shyqty, - deıdi mamandar.

Dárigerlerdiń aıtýynsha, úıde ınektsııa jasaý, bir qaraǵanda ońaı kórinýi múmkin, biraq bul qaýipti. Óıtkeni sterıldilik buzylady, saldarynan ınfektsııa kiredi. Ekpe qoıylatyn emes, basqa jerge qoıyp, nervke zaqym keltirilýi múmkin.

Infektsııa uzaq ýaqyt syr bermeı, keıin adamǵa osy jaǵdaıdaǵy sııaqty zııanyn tıgizedi. Sondyqtan ekpeni tek medıtsına qyzmetkeri jasaǵany durys.

Dárigerler aýyrsynyp jáne tompıyp turǵan jerge ekpe jasatpaýǵa, qyzaryp, aýyrsyný kúsheıgen nemese dene qyzýy kóterilgen jaǵdaıda birden dárigerge kórinýge keńes beredi. Sondaı-aq kez kelgen dári-dármekti tek dárigerdiń nusqaýy boıynsha ǵana qabyldaǵan jón.

Buǵan deıin elde kýrerlerge tumaýǵa qarsy vaktsınany tegin saldyrý máselesi pysyqtalyp jatqanyn jazǵan edik.