SQO-da oıynnan ot shyǵyp, bir úıdiń eki balasy mert boldy
PETROPAVL. QazAqparat – Soltústik Qazaqstan oblysy Aqjar aýdanynda bir úıdiń 10 jastaǵy uly men 8 jastaǵy qyzy mert boldy, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, Aqjar aýdany Talshyq aýylynyń Lýgovaıa kóshesindegi turǵyn úıdiń shóp qorasynda órt shyqqany týraly habar túsken. Oqıǵa ornyna jetken mamandar qora-qopsynyń shatyry jáne qysqa daıyndalǵan shóptiń janyp jatqanyn kórgen. Birden iske kirisken órt sóndirýshiler jalyndy tek 1,5 saǵattan keıin ǵana aýyzdyqtady.
Mamandar oqıǵa ornynan úı ıesiniń 10 jastaǵy uly men 8 jastaǵy qyzynyń denesin tapty.
Kýágerlerdiń aıtýynsha, olar órt shyqpas buryn qoranyń tóbesinde balalardyń oınap júrgenin kórgen. Alaıda ázirge shóp qorasynyń neden órtengeni anyqtalǵan joq.
Mamandar eresekterge balalarmen sóılesip, órt kezinde ózin qalaı ustaýy kerektigin túsindirýge keńes beredi. Óıtkeni kóp jaǵdaıda balalar órtenip jatqan baspanadan qashyp shyǵýdyń ornyna shkaftyń ishine, kereýettiń astyna nemese basqa da jerge tyǵylýǵa tyrysady eken.
«Órtti ózdiginen sóndirýge bolmaıdy, ómirdi qaterge tigip, dúnıe-múlikti saqtap qalýǵa tyryspaý qajet. Esik-terezeni ashýǵa bolmaıdy, sondaı-aq sý tartatyn qubyrmen, jippen tómen túsý qaýipti. Órt shyqqanda lıfti qoldanýǵa bolmaıdy. Sondaı-aq ár ata-ana balasyna arnaıy qyzmetterdiń nómirin jattatýǵa mindetti. Órt shyqqan kezde birden mamandarǵa habar bergen jón», - deıdi departamenttiń baspasóz qyzmeti.
Esterińizge salaıyq, kóktemde osy Aqjar aýdanynda jer úı órtenip, oqıǵa ornynan 4 adamnyń múrdesi tabylǵan edi.
