SQO-da ótken jyly bes áıel otbasyndaǵy zorlyq-zombylyqtan qaıtys boldy

Soltústik Qazaqstan oblysynda otbasyndaǵy zorlyq-zombylyq faktileri azaıǵan. Byltyr osyndaı 47 qylmys jasalyp, tıisti shara qoldanyldy, dep habarlaıdy Kazinform.

SQO polıtsııa departamenti jergilikti polıtsııa qyzmetiniń bas ınspektory Ásııa Ábjanovanyń aıtýynsha, óńirde zorlyq-zombylyqqa qatysty qylmys 1,7 % azaıǵan. 2022 jyly 53 derek tirkelse, byltyr 47 qylmys anyqtaldy. Sonyń 28-i – áıelderge qatysty bolǵan.

«Byltyr úıdegi urys-keris kezinde bes áıel qaıtys boldy, 10 áıel aýyr jaraqat aldy. Taǵy sonshasyna ortasha deńgeıde densaýlyǵyna zııan keldi.

Qylmystyq ister kóbine Petropavlda jasalady. Ol halyq sanyna jáne oıyn-saýyq, kóńil kóterý oryndarynyń kóptigine baılanysty», - deıdi Ásııa Ábjanova.

2023 jylǵy shildede QR Ákmshilik kodeksine engizilgen ózgeristerge baılanysty otbasynyń shyrqyn alatyndardy jazalaý jeńildegen. Buryn japa shegýshiniń aryzy qajet bolsa, endi fakti bolǵan jaǵdaıda polıtseıler iske kirisip, tıisti shara qoldanady.

«Otbasylyq janjal kezinde áıeldiń densaýlyǵyna aýyr zııan keltirilse, qol kótergen adam bas bostandyǵynan aırylýy múmkin. Otbasyndaǵy zorlyq-zombylyq kúıeýi men áıeli arasynda ǵana emes, týǵan-týys, baýyrlar arasynda da bolýy múmkin. Statıstıkaǵa súıener bolsaq, otbasylyq janjaldyń shyǵýynyń basty sebebi – jumyssyzdyq, turmystyq jaǵdaıdyń tómendigi jáne áıelin qyzǵaný», - deıdi polıtsııa qyzmetkeri.