SQO-da ótken táýlikte kóktaıǵaq saldarynan joldarda úsh adam jaraqat aldy
PETROPAVL. KAZINFORM – Soltústik Qazaqstan oblysynyń aýmaǵynda ótken táýlikte 3 jol-kólik oqıǵasy tirkeldi, sonyń saldarynan 3 adam jaraqat aldy. Polıtseıler kóktaıǵaqqa baılanysty joldarda abaı bolýǵa shaqyrady.
Ótken táýlikte SQO-da qar jaýyp, boran turdy. Tústen keıin kún ashylǵanymen, kóktaıǵaq kólik júrgizýshileri men júrginshilerdiń qozǵalysyn qıyndatty.
SQO polıtsııa departamenti baspasóz qyzmetiniń málimetinshe, ótken táýlikte adamdar jaraqattanǵan úsh úlken jol-kólik apaty tirkeldi.
Mysaly, «Astana-Petropavl» respýblıkalyq mańyzy bar avtojolynda «Volkswagen Passat» avtomashınasynyń júrgizýshisi rýldi basqara almaı, «Mersedes» markaly júk kóligimen soqtyǵysqan. Saldarynan eki adam jaraqat aldy.
Sondaı-aq, qalyń jaýǵan qar trassalardaǵy jaǵdaıdy kúrt qıyndatyp jiberdi. Boran kezinde «Astana-Petropavl» avtojolynyń 446-shaqyrymynda júk kóligi jol jıegine shyǵyp ketti. Polıtseıler aýyr júk kóligin jolǵa qaıtarý úshin basqa júk kóligin taýyp, qozǵalys qaýipsizdigin qamtamasyz etti.
Al «Kókshetaý-Rýzaevka» avtojolynyń 77-shaqyrymy Antonovka aýyly mańynda GAZel kóligi joldan shyqty. Júrgizýshi zardap shekken joq. Tártip saqshylary tıegish pen manıpýlıatordy izdeýge kómektesip, kóp uzamaı avtokólik saparyn jalǵastyra aldy.
Polıtseıler júrgizýshilerdi ásirese kóktaıǵaqta asa qyraǵylyq tanytýdy, mindetti túrde qysqy dóńgelekterge aýystyrýdy, kólikti shuǵyl tejeýge bolmaıtyny eskertedi. Jol qozǵalysy erejelerin, jyldamdyq rejımin múltiksiz saqtaý, manevrler men basyp ozý kezinde qyraǵylyq tanytyp, sondaı-aq qajetti ara qashyqtyqty saqtaǵan jón.
Sondaı-aq, SMS-habarlandyrýdy qadaǵalaý qajet, qolaısyz aýa raıynda eldi mekenderden tys jerlerge shuǵyl qajettiliksiz shyqpaý, sondaı-aq árqashan ózimen birge jyly kıim alyp júrý qajet.
Buǵan deıin SQO-ǵa qys kelip, qalyń qar jaýǵanyn jazǵan edik.
