SQO-da ótken táýlikte 6 jol ýchaskesin sý basty

PETROPAVL. QazAqparat – Soltústik Qazaqstan oblysynda mamandar kóktemgi sý tasqynyn baqylaýda ustap otyr. Búgin Tımırıazev aýdanyna jaǵdaıdy retteýge qutqarýshylardan quralǵan arnaıy top attanady, dep habarlaıdy QazAqparat tilshisi.

SQO tótenshe jaǵdaılar departamentiniń bastyǵy Ramıl Kamalovtyń aıtýynsha, Sergeev sý qoımasynan asyp-tógilý 54 sm qurap otyr. Bul bógen rettelmeıdi. ıAǵnı sý qoımasynan ótken sý tómen aǵyspen ketip, Petropavlǵa, odan Reseıdiń Túmen oblysyna barady. Úlken sý Petropavlǵa 10 kún shamasynda jetpek.

«Shaǵyn ózenderdegi sý deńgeıi birer kúnnen keıin tómen túse bastaıdy. Sol sebepti qazir negizinen Esil ózenin Sergeev sý qoımasynan bastap baqylaýǵa alamyz.

Aqmola oblysynan keletin Chaglınka, Sileti ózenderinen de qaýip joǵary. Sondaı-aq Esilge quıatyn Kolýton men Jabaı ózenderine de kúndelikti monıtorıng júrgiziledi», - deıdi Ramıl Kamalov.

Ótken táýlikte Aıyrtaý, Esil jáne Shal aqyn aýdandarynda respýblıkalyq, oblystyq, aýdandyq mańyzdaǵy joldarda 6 ýchaskeni sý basty. Ekeýinde qazir jaǵdaı turaqtaldy. Aýyl ishindegi joldardy sý basqanymen, úılerge sý kirgen joq.

Mamandar óńirdegi ózenderden basqa Úlken Torańǵuldy da nazarda ustap otyr. Kólge Qamysaqty ózeni quıady. Kól deńgeıi birtindep kóterilip keledi.

«Sońǵy ret SQO-da 2017 jyly úlken sý tasqyny boldy. Biraq bıyl qarqyny tómen. Esil ózenine quıatyn Kolýton men Jabaı ózenderinde, máselen, sý deńgeıi jyldaǵy ortasha kórsetkishten tómen. Sol sebepti qazirgi boljam boıynsha úlken sý tasqyny bolmaıdy. Desek te, arqany keńge salmaı, jaǵdaıdy baqylaýǵa aldyq», - deıdi departament bastyǵy.

Óńirdiń sý tasqyny qaýpi joǵary Ǵabıt Músirepov, Aıyrtaý, Ýálıhanov aýdandarynda qutqarýshylar men órt sóndirýshilerden quralǵan arnaıy top jumys istep jatyr. Búgin dál osyndaı top Tımırıazev aýdanyna attanbaq.