SQO-da ótken táýlikte 23 bala KVI juqtyrdy

PETROPAVL. QazAqparat – Soltústik Qazaqstan oblysynda ótken táýlikte 23 bala koronavırýs juqtyrdy. Qazirgi ýaqytta aýyrǵan 163 bala dárigerlerdiń baqylaýynda, dep habarlaıdy QazAqparat tilshisi.

SQO densaýlyq saqtaý basqarmasy baspasóz qyzmetiniń málimetinshe, pandemııa bastalǵaly óńirde 18 jasqa deıingi 2 574 bala koronavırýs juqtyrdy. Olardyń 2 410-y táýir boldy. Syrqattanyp, jazylǵan balalardyń arasynda mýltıjúıelik qabyný sındromy, ıaǵnı aýrýdan keıin bolatyn ımmýnologııalyq qubylys tirkelmegen.

Qazirgi ýaqytta KVI juqtyrǵan 163 balany dárigerler baqylaýǵa alǵan, olardyń 22-si statsıonarda em alyp jatyr. Barlyǵynyń jaǵdaıy – ortasha. Ambýlatorlyq em alyp jatqandardyń 82-sinde aýrý belgileri joq. Qalǵandarynda aýrý jeńil ótip jatyr.

Ótken táýlikte oblysta 143 adam qaýipti ınfektsııany juqtyrsa, solardyń 23-i bala. Úsheýi statsıonardan úılerine jiberildi, taǵy 15 baladan úı karantıni alyndy.